اسلام آباد : امریکی ڈالر کے مقابلے میں پاکستانی روپیہ یومیہ بنیادوں پر مسلسل تگڑا ہورہا ہے جس کے سبب روپے کو دنیا میں نمایاں مقام مل گیا۔
تفصیلات کے مطابق پاکستانی کرنسی نے رواں ماہ ستمبر میں ڈالر کے مقابلے میں دنیا کی بہترین کارکردگی والی کرنسی کا اعزاز حاصل کرلیا۔
اس حوالے سے بلوم برگ اور اسٹیٹ بینک کی جانب کردہ فراہم کردہ اعداد و شمار کے مطابق امریکی ڈالر کے مقابلہ میں ستمبر میں پاکستانی کرنسی کی قدر میں 5.4 فیصد کی نمو ریکارڈ کی گئی جو دنیا بھر میں امریکی ڈالر کے مقابلہ میں سب سے زیادہ ہے۔
31اگست کو امریکی ڈالر کے مقابلے میں پاکستانی کرنسی کی قدر 305.54 روپے ریکارڈ کی گئی جو 26 ستمبر کو 289.80 روپے ہوگئی۔
اس فہرست میں کولمبیا کی کرنسی دوسرے اور موریشیس کی کرنسی تیسرے نمبر پر رہی۔ کولمبیا کی کرنسی کی قدر میں ستمبر کے دوران ڈالر کے مقابلہ میں 0.8 فیصد کی بڑھوتری ریکارڈ کی گئی، اسی طرح موریشیس کی کرنسی کی قدر میں گزشتہ ایک ماہ کے دوران 0.5 فیصد کی شرح سے نمو دیکھنے میں آئی۔
