لندن: پاکستانی نژاد برطانوی طالب علم محمد نے امریکی سرمایہ کار کی جانب سے 5 ملین پاؤنڈز کی پیش کش کو مسترد کردیا۔
برطانوی میڈیا کے مطابق لندن میں مقیم 16 سالہ پاکستانی نژاد طالبعلم محمد علی نے پیسوں کی بچت سے متعلق ایک ویب سائٹ تیار کی ہے جس کے ذریعے اشیاء کی قیمتوں کا باآسانی اندازہ کیا جاسکتا ہے۔
امریکی سرمایہ کار نے محمد علی کی ویب سائٹ دیکھ کر اُسے خریدنے کی دلچپسی ظاہر کرتے ہوئے اس کی قیمت 5 ملین پاؤنڈ لگائی تاہم مسلم نوجوان نے اسے مسترد کردیا۔
محمد علی کا کہنا ہے کہ اتنی بڑی پیش کش مسترد کرنے کا مقصد صرف عوام کا استعمال تھا، یہ ویب سائٹ بلوم برگ کی طرح کام کرتی ہے جسے روزانہ کی بنیاد پر صارفین آکر استعمال کرتے ہیں۔
نوجوان طالب علم نے مزید کہا کہ امریکی سرمایہ کاری کی پیش کش میرے پروجیکٹ کے مقابلے میں کافی کم ہے تاہم جلد نئی ویب سائٹ کی تیاری مکمل ہوتے ہی اس کی فروخت کے بارے میں کچھ سوچوں گا۔
امریکی سرمایہ کار کا کہنا ہے کہ ہم نے لندن کی کئی کمپنیز اور ڈیٹا اکھٹا کرنے والی کمپنیز سے رابطہ کیا مگر کوئی متاثر کرنے میں کامیاب نہیں رہا مگر جیسے ہی علی کی ویب سائٹ پر نظر پڑی تو یہ ہمیں بہت پسند آئی۔ محمد علی کا کہنا ہے اُن کی ویب سائٹ پیسوں کی سیونگ میں بہت کارآمد ہے کیونکہ اس میں مختلف انشورنس کمپنیز سمیت دیگر اعلیٰ کمپنیوں کی چیزیں شامل کی گئی ہے۔
نوجوان طالب علم کا کہنا ہے کہ اُس نے اس سے قبل ایک گیمنگ ویب سائٹ تیار کی تھی جس کی فروخت پر اُسے 40 ہزار پاؤنڈز کی آمدنی حاصل ہوئی تھی، محمد علی نے 2006 میں پہلی بار گیمنگ ویب سائٹ تیار کر کے شہرت حاصل کی تھی۔
