دبئی : پرائیوٹ کمپنی میں کام کرنے والے پاکستانی ٹیکنیشن کو چھٹیاں نہ دینے پر اپنے بھارتی سپروائزر کو قتل کرنے کے الزام پر گرفتار کرلیا گیا ہے۔
تفصیلات کے مطابق جبل علی اندسٹریل ایریا میں 25 سالہ پاکستانی نے وطن واپس جانے کے لیے اپنے سپروائزر کو درخواست دے رکھی تھی جسے نا منظور کردیا گیا تھا جس پر طیش میں آکر نوجوان نے اپنے سپروائزر کو قتل کردیا۔
ملزم کو حراست میں لے کر عدالت میں پیش کردیا گیا جہاں پراسیکیوٹر نے بتایا کہ ملزم نے سپروائزر سے تلخ کلامی کے بعد اسے چھریوں کے وار کر کے قتل کیا جب کہ اس دوارن ایک اور ملازم بھی زخمی ہوا جو سپروائزر کو حملے سے بچا رہا تھا۔
عدالت میں جمع کرائے گئے چالان کے مطابق ملزم کے قبضے سے آلہ قتل برآمد کرلیا گیا ہے جب کہ ملزم نے بھی قتل کا اعتراف کر لیا ہے اور غصے کی رو میں بہہ کر کیے گئے قتل پر ندامت کا اظہار کیا ہے۔
عدالت نے ملزم کو 14 جنوری تک پولیس کے ریمارنڈ پر بھیج دیا گیا ہے جو مزید شواہد اکھٹا کرکے عدالت میں پیش کرے گی اور گواہوں کے بیانات قلم بند ہونے کے بعد عدالت اپنا فیصلہ سنادے گی۔
