اسلام آباد: سوڈان مین خانہ جنگی کے بعد غیر ملکیوں کا انخلا جاری ہے، سوڈان میں موجود 427 پاکستانی سوڈان پورٹ پہنچ چکے ہیں جہاں سے وہ آگے کا سفر کریں گے۔
تفصیلات کے مطابق ترجمان دفتر خارجہ کا کہنا ہے کہ سوڈان میں ہونے والی پیش رفت پر نظر رکھے ہوئے ہیں، تاحال 427 پاکستانی بحفاظت سوڈان پورٹ پہنچ گئے ہیں۔
ترجمان کا کہنا ہے کہ سوڈان میں پاکستانیوں کو ریلیف دینے کے لیے اپنے مشنز کے ساتھ مل کر کام کر رہے ہیں، پاکستانیوں کے اگلے سفر کے انتظامات کیے جا رہے ہیں۔
خیال رہے کہ سوڈان میں اس وقت 15 سو پاکستانی خاندان مقیم ہیں جنہیں خوراک، ادویات اور دیگر اشیا کی قلت کا سامنا ہے۔
دارالحکومت خرطوم اور دیگر شہروں کے ہوائی اڈے بند ہوچکے ہیں جبکہ زمینی راستوں سے بھی گزرنا مشکل ہوگیا ہے۔
پاکستانی سفارتی مشن خرطوم ہم وطنوں کے انخلا کے لیے مشاورت کر رہا ہے، مصر اور ایتھوپیا میں پاکستانی سفارتی مشنز بھی متعلقہ حکومتوں سے رابطے میں ہیں۔
