کراچی: سندھ حکومت نے کینجھر جھیل پر ملک کے پہلے فلوٹنگ سولر پاور پلانٹ منصوبے کی تیاری کر لی۔
تفصیلات کے مطابق وزیر توانائی سندھ امتیاز احمد شیخ نے کہا ہے کہ 500 میگا واٹ کا پانی پر تیرتا ہوا پاکستان کا پہلا شمسی بجلی بنانے کا منصوبہ کینجھر جھیل پر بہت جلد شروع کر دیا جائے گا۔
اس فلوٹنگ سولر پاور پراجیکٹ کا لیٹر آف انٹینٹ (LoI) جاری کر دیا گیا ہے، منصوبے کی فیزیبیلیٹی رپورٹ پر کام تیزی سے جاری ہے، امید ہے کہ منظوری کے مراحل سے گزر کر یہ منصوبہ 2 سال میں بجلی پیدا کرنا شروع کردے گا۔
وزیر توانائی کے مطابق اس منصوبے پر گو (Go) کمپنی کام کر رہی ہے اور اس میں 400 ملین ڈالر کی سرمایہ کاری متوقع ہے۔
قومی سولر انرجی پالیسی کا اعلان یکم اگست کو کیا جائے گا
وزیر توانائی سندھ امتیاز احمد شیخ نے پاور کمپنیوں کے افسران سے ملاقات کی، انھوں نے کہا اپنی نوعیت کے پاکستان کے اس پہلے اور منفرد فلوٹنگ سولر پاور پلانٹ کے منصوبے سے نہ صرف 500 میگا واٹ ماحول دوست بجلی مہیا ہوگی بلکہ اس منصوبے سے صوبے میں روزگار کے مواقع بھی پیدا ہوں گے اور کینجھر جھیل پر سیاحت کو مزید فروغ بھی حاصل ہوگا۔
انھوں نے کہا کہ منصوبے کی فیزیبیلیٹی رپورٹ پر کام تکمیل کے مراحل میں ہے اور توقع ہے کہ یہ منصوبہ آ ئندہ 24 ماہ میں بجلی کی پیداوار شروع کر دے گا۔
انھوں نے مزید کہا کہ 500 میگا واٹ ماحول دوست بجلی کا یہ منصوبہ سندھ حکومت کی کامیابیوں کا ایک اور سنگ میل ہے۔
