سہ فریقی ٹی ٹوئنٹی سیریز میں پاکستان نے نیوزی لینڈ کو جیت کے لیے 131 رنز کا ہدف دیا ہے، پاکستان کا ٹاپ آرڈر ایک بار پھر ناکام رہا۔
نیوزی لینڈ کے شہر کرائسٹ چرچ میں سہ فریقی ٹی ٹوئنٹی سیریز میں پاکستان نے اپنے تیسرے میچ میں ٹاس جیت کر پہلے بیٹنگ کرنے کا فیصلہ کیا جو کہ ٹاپ آرڈر کے جلد آؤٹ ہونے کے باعث غلط ثابت ہوا اور پاکستانی ٹیم 7 وکٹوں کے نقصان پر صرف 130 رنز بنا سکی۔
پاکستان کو پہلا نقصان محمد رضوان کے آؤٹ ہونے کی صورت میں اٹھانا پڑا جب وہ 30 کے مجموعی اسکور پر 16 رنز بنا کر آؤٹ ہوئے، انہیں بریسویل نے نشام کے ہاتھوں کیچ آؤٹ کرایا، شان مسعود 14 رنز بنا کر پویلین لوٹ گئے، اس بار کامیابی سینٹر کے حصے میں آئی، نائب کپتان شاداب خان صرف 8 رنز بنا کر سینٹر کا شکار ہوئے۔
ٹیم کا مجموعہ 65 رنز پر پہنچا تھا کہ کپتان بابر اعظم بھی ہمت ہار گئے اور 21 رنز کے انفرادی اسکور پر بریسویل اور نشام کے گٹھ جوڑ کا شکار ہوئے۔ 77 رنز پر حیدر علی آؤٹ ہوئے تو پاکستان کی آدھی ٹیم پویلین لوٹ چکی تھی۔
اس موقع پر آصف علی اور افتخار احمد نے ٹیم کو کچھ سہارا دیا اور دونوں کے درمیان 51 رنز کی پارٹنر شپ ہوئی، اس پارٹنر شپ کو سوتھی نے توڑا اور افتخار احمد کو ٹکنر کے ہاتھوں کیچ آؤٹ کرا دیا۔سوتھی نے اگلی ہی گیند پر محمد نواز کو کھاتہ کھولے بغیر واپس پویلین بھیج دیا۔
مقررہ 20 اوورز کے اختتام پر آصف علی 25 رنز بنا کر ناٹ آؤٹ رہے جب کہ محمد وسیم نے ایک رنز بنایا ہوا تھا۔
نیوزی لینڈ کی جانب سے سب کے کامیاب بولر مائیکل بریسویل رہے جنہوں نے صرف 11 رنز دے کر پاکستان کے دو ان فارم بلے بازوں کپتان بابر اعظم اور محمد رضوان کی قیمتی وکٹیں حاصل کیں، ٹم سوتھی نے 31 اور مچل سینٹر نے 27 رنز کے عوض دو دو وکٹیں حاصل کیں۔
پاکستان ٹیم میں ایک تبدیلی کی گئی تھی، حارث رؤف کو آرام کا موقع دے کر ان کی جگہ نسیم شاہ کو ٹیم میں شامل کیا گیا ہے۔
سہ فریقی سیریز میں پاکستان اپنے دو میچ جیت کر پوائنٹس ٹیبل پر سر فہرست ہے، نیوزی لینڈ نے ایک میچ جیت رکھا ہے جب کہ بنگلہ دیش ابھی تک فتح سے محروم ہے۔
