امریکی صدر جوبائیڈن کے لئے انتخابی مہم چلانا مشکل ہوگیا، اسرائیلی مظالم کے خلاف شدید نعرے بازی کرنے والوں نے بائیڈن کے لئے نئی مشکل کھڑی کردی ۔
غیر ملکی ذرائع ابلاغ کے مطابق امریکی صدر انتخابی مہم کے سلسلے میں ورجینیا میں تقریر کررہے تھے، اس دوران فلسطینیوں کے حامی بار بار کھڑے ہوتے رہے اور فلسطینیوں کے حق میں نعرے لگا تے رہے۔
فلسطین کا پرچم تھامے ان افراد کی جانب سے مطالبہ کیا جارہا تھا کہ اسرائیلی مظالم کا سلسلہ بند کیا جائے اور فوری جنگ بندی کرائی جائے۔
امریکی صدر کی تقریر کے دوران خلل ڈالنے والے ان افراد کو روک کر باہر نکالا جاتا رہا تاہم ایک کے بعد دوسرا شخص سامنے آجاتا تھا۔
دوسری جانب امریکا کی جانب سے غزہ میں علاقائی تبدیلیوں اور غزہ میں بفرزون بنانے کی اسرائیلی تجویز کو مسترد کردیا گیا ہے۔
رپورٹ کے مطابق امریکی وزیر خارجہ انٹونی بلنکن کا اس حوالے سے کہنا ہے کہ اسرائیل کو 7 اکتوبر جیسا حملہ دوبارہ ہونے سے روکنے کا حق ہے، لیکن جب غزہ کی مستقل حیثیت کی بات آتی ہے تو ہم بہت واضح ہیں۔
اسرائیلی فوج کے تازہ سفاکانہ حملوں میں مزید 200 فلسطینی شہید، 304 زخمی
امریکی وزیر خارجہ انٹونی بلنکن نے مزید کہا کہ ہم اس کی سرزمین پر تجاوزات نہ کرنے کے بارے میں واضح ہیں، نقل مکانی کرنے والوں کی گھروں کو واپسی کی حمایت کرتے ہیں۔
