پاناماکینال اتھارٹی نے امریکی جہازوں کیلئے مفت گزرنے کے امریکی دعوے کی تردید کر دی۔
پاناما کینال اتھارٹی نے واضح کیا ہے کہ امریکی جہازوں کی آمدورفت کیلئے واشنگٹن کیساتھ بات ہو سکتی ہے۔
اس سے قبل امریکی محکمہ خارجہ نے دعویٰ کیا تھا پاناما کینال سے گزرنے سے متعلق معاہدہ ہو گیا ہے جس کے مطابق امریکی جہازوں کو فیس ادا کیے بغیر پانا ماکینال سے گزرنے کی اجازت ہو گی۔
خبر ایجنسی کا کہنا ہے کہ پاناما کینال اتھارٹی پاناما حکومت کے زیرِنگرانی ایک خودمختار ادارہ ہے پاناماکینال اتھارٹی نے امریکی محکمہ خارجہ کے دعوے کی تردیدکر دی ہے۔
امریکی محکمہ خارجہ نے بدھ کو کہا ہے کہ امریکی حکومت کے جہاز اب بغیر کسی فیس کے پاناما کینال سے گزریں گے۔
محکمے نے X پر ایک پوسٹ میں کہا ’’پاناما کی حکومت نے امریکی حکومت کے جہازوں سے پاناما کینال سے گزرنے کے لیے مزید فیس وصول نہ کرنے پر اتفاق کیا ہے۔‘‘ محکمے کے مطابق اس معاہدے سے امریکی حکومت کو ہر سال لاکھوں ڈالر کی بچت ہوگی۔
پاناما کینال اتھارٹی کی جانب سے اس پر کوئی بیان سامنے نہیں آیا ہے، یاد رہے کہ امریکی وزیر خارجہ مارکو روبیو نے اتوار کو وسطی امریکا کے دورے کے دوران پاناما کے صدر حوزے راؤل ملینو سے ملاقات کی تھی۔
ڈونلڈ ٹرمپ کی حکومت نے پاناما پر توجہ مرکوز کر رکھی ہے، امریکی صدر نے اس وسطی امریکی ملک پر الزام بھی لگایا ہے کہ وہ پاناما نہر کی گزرگاہ کے لیے حد سے زیادہ قیمتیں وصول کر رہا ہے۔
ڈونلڈ ٹرمپ نے گزشتہ ماہ پاناما کو اخلاقی اور قانونی اصولوں کی عدم پاسداری کی آڑ میں پاناما کینال کو واپس لینے کی دھمکی دی تھی، انھوں نے کہا تھا کہ اگر ’بخشش‘ کے اصولوں پر عمل نہیں کیا جاتا تو پھر ہم مطالبہ کریں گے کہ پاناما کینال ہمیں مکمل طور پر اور بغیر کسی سوال کے واپس کر دیا جائے۔
ملینو نے ٹرمپ کی اس دھمکی کو مسترد کر دیا ہے کہ امریکا نہر پر دوبارہ کنٹرول حاصل کر لے گا۔ کئی دہائیوں سے اس گزرگاہ کے ارد گرد کا علاقہ امریکی زیر انتظام ہے۔ لیکن امریکا اور پاناما نے 1977 میں دو معاہدوں پر دستخط کیے تھے، جس سے نہر کا مکمل کنٹرول واپس پاناما کو مل گیا تھا، اور امریکا نے 1999 میں مشترکہ انتظامیہ کی مدت پوری ہونے کے بعد اسے پاناما کے حوالے کیا۔
