پشاور : جمیعت علمائے اسلام ف کے رہنما احد خٹک نے پرویز خٹک کو اپنی نئی سیاسی جماعت بنانے پر کڑی تنقید کا نشانہ بناتے ہوئے کہا ہے کہ پرویزخٹک اپنی نشست بھی ہار جائیں گے۔
جے یو آئی رہنما احدخٹک جو رشتے میں پرویز خٹک کے بھتیجے بھی ہیں نے اپنے ایک بیان میں کہا کہ یہ سب لوگ پی ٹی آئی کے ووٹ پر مزے کررہے تھے۔
انہوں نے کہا کہ اب ان لوگوں کو پتہ چلے گا کہ الیکشن لڑنا کسے کہتے ہیں، میرےوالد2018میں الیکشن پی ٹی آئی کے ووٹ پر ہی جیتے تھے۔
اپنے چچا پر تنقید کرتے ہوئے احد خٹک کا کہنا تھا کہ پرویزخٹک کے فیصلے کے بعد مخالف امیدواروں کھلا میدان مل گیا ہے، آئندہ الیکشن میں ہمارا مقابلہ پی ٹی آئی کے ساتھ ہوگا پرویزخٹک کے ساتھ نہیں۔
ان کا مزید کہنا تھا کہ کے پی میں پارٹی ووٹ ہوتے ہیں، الیکٹیبلز نہیں ہوتے، جے یو آئی نے بہت زیادہ عزت دی ہے ہم ان کے ساتھ کھڑے رہیں گے، پرویزخٹک اپنی نشست بھی ہارجائیں گے۔
واضح رہے کہ تحریک انصاف کے سابق رہنما اور سابق وفاقی وزیر پرویزخٹک نے پی ٹی آئی پارلیمینٹرینز کے نام سے اپنی نئی سیاسی جماعت کا باقاعدہ اعلان کردیا ہے۔
سابق وزیراعلیٰ خیبرپختونخوا محمود خان بھی ان کی نئی سیاسی جماعت میں شامل ہیں جبکہ ایک اطلاع کے مطابق پی ٹی آئی کے 57 سابق ارکان اسمبلی نے پرویز خٹک کی حمایت کا اعلان کیا ہے اور پرویز خٹک پارٹی کے سربراہ مقرر کردیئے گئے ہیں۔
