کراچی سے اسلام آباد پہنچنے والی نجی ایئرلائن کے طیارے سے پرندہ ٹکرا گیا، حادثے میں کوئی جانی یا مالی نقصان نہیں ہوا۔
اے آر وائی نیوز کو موصول ہونے والی اطلاعات کے مطابق کراچی سے وفاقی دارالحکومت اسلام آباد انٹرنیشنل ایئرپورٹ پہنچنے والی نجی ائیرلائن کی پرواز خوفناک حادثے کا شکار ہونے سے بال بال بچ گئی۔
مسافر طیارے سے پرندہ ٹکرا گیا تاہم حادثے کے باوجود کپتان نے طیارے کو مہارت سے اسلام آباد ایئرپورٹ پر اتار لیا۔
ایئرپورٹ ذرائع کا کہنا ہے کہ اسلام آباد سے کراچی آنے کےلیے پرواز میں تاخیر ہوگئی کیوں کہ انجینئرز متاثرہ طیارے کی جانچ کررہے ہیں، طیارے کے ٹھیک ہونے کے بعد پرواز کو کراچی کےلیے روانہ کیا جائے گا۔
خیال رہے کہ ایئرپورٹ کے اطراف میں رہائشی آبادیاں بنانے اور کچرا پھینکنے کے باعث پرندے ہوائی اڈے کے اردگرد اور رن کے قریب پرواز کرتے رہتے ہیں جس کے باعث طیاروں سے پرندے ٹکرانے کے واقعات بڑھتے جارہے ہیں۔
تین اکتوبر کو بھی کراچی سے اسلام آباد پہنچنے والی نجی ایئرلائن کی پرواز ای آر 500 سے پرندہ ٹکرا گیا تھا۔
