کراچی: جعلی سفری دستاویزات پر متحدہ عرب امارات اور پولینڈ جانے والے 2 مسافروں کو کراچی اور پشاور ایئرپورٹس پر آف لوڈ کر کے حراست میں لے لیا گیا۔
تفصیلات کے مطابق ایف آئی اے امیگریشن نے پشاور ایئر پورٹ پر ایک کارروائی میں جعلی سفری دستاویزات پر براستہ استنبول، ترکی سے پولینڈ جانے والے مسافر کو آف لوڈ کر دیا۔
ترجمان ایف آئی اے کے مطابق عمران خان نامی مسافر کی جانب سے پیش کیا جانے والا پولش ریزیڈنٹ کارڈ جعلی نکلا، ملزم کو ترکیہ کا ویزہ بھی پولش ریزیڈنٹ کارڈ کی بنا پر جاری ہوا تھا۔
ابتدائی تفتیش کے مطابق ملزم 2017 میں پولینڈ سے پاکستان آیا تھا، جب کہ پولش ریزیڈنٹ کارڈ 2022 میں جاری ہوا، ملزم نے دوران تفتیش بتایا کہ یہ کارڈ اس کے کزن نے بنوا کر دیا تھا۔
ملزم کو قانونی کارروائی کے لیے ایف آئی اے اینٹی ہیومن ٹریفیکنگ سرکل پشاور کے حوالے کر دیا گیا۔
ادھر کراچی ایف آئی اے امیگریشن نے جناح انٹرنیشنل ایئر پورٹ پر کارروائی میں افغان شہری خان محمد کو آف لوڈ کر کے حراست میں لے لیا گیا ہے۔
گرفتار ملزم امیگریشن کلیئرنس کے دوران پوچھے گئے سوالات پر حکام کو مطمئن نہ کر سکا، ملزم جائے پیدائش اور اپنے خاندان کے افراد کے حوالے سے مکمل طور پر لاعلم تھا۔
ترجمان ایف آئی اے کے مطابق ملزم ملازمت کی غرض سے پاکستانی پاسپورٹ پر یو اے ای جا رہا تھا، جسے قانونی کارروائی کے لیے اینٹی ہیومن ٹریفیکنگ سرکل کراچی منتقل کر دیا گیا ہے۔
