شاہ رخ خان کی حال ہی میں ریلیز ہونے والی فلم پٹھان نے جہاں سنیماؤں میں کھڑکی توڑ رش دیکھا، وہاں باکس آفس پر فلم نے جو بزنس کیا، اس کے اعداد و شمار نے لوگوں کو حیران کر دیا ہے، بالخصوص آپ کو یہ جان کر حیرانی ہوگی کہ خود بالی ووڈ بادشاہ نے اس فلم کے لیے کتنا معاوضہ لیا۔
شاہ رخ خان نے فلم ’پٹھان‘ کے ذریعے کئی سال بعد بڑی اسکرین پر واپسی کی تھی، اس دوران سپر اسٹار کے دور کے خاتمے کی باتیں کی جا رہی تھیں، لیکن پٹھان کی سپر ہٹ کامیابی نے سب کے منہ بند کر دیے۔
انٹرٹینمنٹ ویب سائٹ ’بولی ووڈ ہنگامہ‘ نے 25 جنوری 2023 کو ریلیز ہونے والی فلم پٹھان کے بزنس کے اعداد و شمار پر ایک رپورٹ جاری کی ہے، جس میں کہا گیا ہے کہ کمائی کے کئی ریکارڈز قائم کرنے والی اس فلم میں شاہ رخ کا منافع 2 ارب روپے تھا۔
شاہ رخ خان نے فلم کا معاوضہ نہیں لیا تھا بلکہ مجموعی منافع میں ان کا حصہ 60 طے ہوا تھا، جس سے ان کے حصے کی رقم 200 کروڑ بھارتی روپے (687 کروڑ پاکستانی روپوں سے زائد) بنی، یعنی شاہ رخ کا معاوضہ کئی بولی ووڈ فلموں کے مجموعی بجٹ سے بھی زیادہ ہے۔
واضح رہے کہ فلم پٹھان نے دنیا بھر میں 1050 کروڑ بھارتی روپے کا بزنس کیا تھا، جن میں سے 545 کروڑ روپے کی آمدنی بھارت میں ہوئی، 1050 کروڑ میں سے پروڈیوسرز کا منافع 333 کروڑ روپے تھا۔
