دبئی پبلک ٹرانسپورٹ اتھارٹی کی جانب سے شہریوں کی سہولت کے لئے اہم فیصلہ کیا گیا ہے، رہائشی اب پبلک ٹرانسپورٹ سے سفر کے لیے کرایہ ’فیس ریڈنگ‘ کے ذریعے ادا کر سکیں گے۔
بین الاقوامی خبر رساں ادارے کی رپورٹ کے مطابق اس نئے طریقہ کار کے بعد پلاسٹک کارڈز، ٹکٹ، کریڈٹ کارڈز اور ’نول‘’کی ضرورت نہیں رہے گی۔
اتھارٹی کی جانب سے فیس ریڈنگ کے ذریعے کرائے کی ادائیگی کے پروگرام کا تعارف جیٹکس 2023 میں کرایا جارہا ہے، جیٹکس 2023 دبئی ورلڈ کمرشل سینٹر میں جاری ہے۔
ادارے کے ڈائریکٹر صلاح المرزوقی کا اس حوالے سے کہنا تھا کہ پبلک ٹرانسپورٹ سے سفر کرنے والوں کے لیے کرائے کی ادائیگی کا نیا اور آسان طریقہ متعارف کرا رہے ہیں۔
صلاح المرزوقی نے بتایا کہ دبئی پبلک ٹرانسپورٹ سسٹم میں ہر شخص کا ایک کارڈ ہو گا۔ سمارٹ گیٹ سے گزرتے وقت فیس ریڈنگ پر متعلقہ شحص کے اکاؤنٹ سے کرائے کی رقم وصول ہو جائے گی۔
انہوں نے کہا کہ ’نول کارڈ استعمال کرنے والوں کو صرف ایک بار فیس ریڈنگ کرانا ہوگی، میٹرو دبئی، ٹرام دبئی، پبلک بس، ٹیکسی اور سمندری ٹرانسپورٹ میں سے کسی سے بھی سفر کرتے وقت مسافر کی فیس ریڈنگ کی جائے گی۔ خودکار سسٹم سے مسافر کے اکاؤنٹ سے کرایہ ادا ہو جایا کرے گا۔
انہوں نے بتایا کہ پہلے مرحلے میں کرائے کی ادائیگی کے لیے دیگر طریقے ختم نہیں کئے جائیں گے، بلکہ مرحلہ وار ان کی جگہ فیس ریڈنگ سسٹم نافذ کیا جائے گا۔
صارفین کو ابتدا میں یہ اختیار حاصل رہے گا کہ وہ چاہیں تو کارڈ کے یا فیس ریڈنگ کے ذریعے ادائیگی کرسکتے ہیں۔
واضح رہے کہ دبئی میں پبلک ٹرانسپورٹ استعمال کرنے والے ان دنوں کرائے کی ادائیگی کے لیے نول کارڈ کا استعمال کر رہے ہیں جبکہ موبائل کے ذریعے ڈیجیٹل سسٹم بھی متعارف کرایا گیا ہے۔ جس کے ذریعے کرائے کی ادائیگی ہورہی ہے۔
