لاہور: چیئرمین کرکٹ بورڈ احسان مانی نے قومی ٹیم کے کپتان سرفراز احمد کو پرسکون رہنے کا مشورہ دے دیا.
تفصیلات کے مطابق چئیرمین پی سی بی احسان مانی نے کپتان سرفراز احمد سے ٹیلی فون پر گفتگو کی، چیئرمین پی سی بی نے کپتان کا حوصلہ بڑھایا اور پرسکون رہنے کی ہدایت کی.
احسانی مانی نے قومی ٹیم کے کپتان سے کہا کہ ٹیم کو ابھی چار اہم میچز کھیلنے ہیں، چار میچوں میں اچھی کارکردگی پر فوکس کریں، باقی باتوں کو بھول جائیں.
احسان مانی نے سرفراز احمد سے کہا کہ پاکستان ٹیم ورلڈ کپ میں ابھی موجود ہے، بے بنیاد خبروں پر توجہ دے کر کھیل سے دھیان نہ ہٹائیں.
مزید پڑھیں: قومی کرکٹ ٹیم کے کپتان سرفراز احمد کھلاڑیوں پر برس پڑے
چیئرمین پی سی بی نے کہا کہ شائقین کرکٹ کو ٹیم سے بڑی امیدیں وابستہ ہیں، قوم آپ کے ساتھ ہے، آپ اچھا کھیلیں.
خیال رہے کہ بھارت کے خلاف شکست کے بعد پاکستانی ٹیم کو شدید تنقید کا سامنا ہے. ٹیم میں گروہ بندی کی بھی خبریں ہیں.
یاد رہے کہ بھارت کے ہاتھوں عبرت ناک شکست کے بعد کپتان سرفراز احمد نے ڈریسنگ روم میں ٹیم ارکان کے سامنے شدید غصے کا اظہار کرتے ہوئے کہا تھا کہ اگر میں گیا، تو اکیلا نہیں جاؤں گا.
