لاہور : سابق صدر آصف زرداری کا کہنا ہے کہ بلاول بھٹو کو وزیراعظم بنانے کے لیے حکمت عملی پر کام جاری ہے، الیکشن کے بعد پیپلز پارٹی کسی بھی پارٹی سے اتحاد کرسکتی ہے۔
تفصیلات کے مطابق سابق صدر آصف زرداری نے اسلام آباد میں ملاقات کرنے والوں سے غیر رسمی گفتگو کرتے ہوئے کہا کہ الیکشن کے بعد پیپلز پارٹی کسی بھی پارٹی سے اتحاد کرسکتی ہے۔
آصف زرداری کا کہنا تھا کہ بلاول بھٹو کو وزیراعظم بنانے کے لیے حکمت عملی پر کام جاری ہے، یہ طے ہے جس جماعت کےپاس اکثریت ہوگی پہلے اسے حکومت کا موقع دیا جائے گا۔
آزاد امیدواروں کے حوالے سے انھوں نے کہا کہ آزاد امیدوار سب کے لیے اہمیت اختیار کرجائیں گے، اس بار پیپلز پارٹی پورے پاکستان سے پہلے کے مقابلے میں زیادہ نشستیں لے گی اور پیپلز پارٹی واحد جماعت ہوگی جو چاروں صوبوں سے نمائندگی حاصل کرلے گی۔
پیپلز پارٹی کے شریک چیئرمین کا کہنا تھا کہ بلاول درست کہہ رہےہیں کہ کسی کی ماں بہن جیل میں نہیں ہونی چاہیے، ماضی میں مجھے اور میری بہن کو جیل میں رکھ کر غلط روایت ڈالی گئی۔
آصف زرداری نے کہا کہ بلاول بھٹو وزیراعظم بنا تو ملک میں کوئی سیاسی قیدی نہیں ہوگا، جس کسی نے قانون کی نظر میں جرم کیا انہیں عدالتوں کا سامنا کرنا پڑے گا۔
ان کا مزید کہنا تھا کہ ہم اقتدار میں آکر اچھی روایات کی بنیاد ڈالیں گے، میں جب صدر تھا جب کوئی سیاسی قیدی نہیں تھا، پیپلز پارٹی اوروں کی طرح سیاسی انتقام پریقین نہیں رکھتی۔
