لاہور : ترکیہ میں زلزلے کے بعد محصور 15 پاکستانی طلبہ وطن واپس پہنچ گئے، انقرہ میں پاکستانی سفارت خانے کی کاوشوں سے طلبہ کی واپسی ممکن ہوئی۔
تفصیلات کے مطابق ترکیہ میں ہولناک زلزلے کے بعد متاثرہ علاقوں میں پھنسے ہوئے پندرہ پاکستانی طلبہ وطن واپس پہنچ گئے۔
طلبہ قومی ائیرلائن کی پرواز پی کےسیون زیرو ایٹ کے ذریعے علی الصبح استنبول سے لاہور پہنچے ہیں۔
انقرہ میں پاکستانی سفارت خانے کی کاوشوں سے طلبہ کی واپسی ممکن ہوئی ہے، لاہور ائیرپورٹ پہنچنے کے بعد تمام طلبہ اپنے آبائی علاقوں کو روانہ ہوگئے۔
واضح رہے ترکیہ اور شام میں زلزلے سے اموات کی تعداد25 ہزار سے تجاوزکرگئیں اور مزید اضافے کا خدشہ ہے جبکہ 80 ہزار سے زائد زخمی ہیں۔
ترک میڈیا کے مطابق ترکیہ میں مرنیوالوں کی تعداد بیس ہزار دو سو تیرہ اور زخمی ستتر ہزار سے زائد ہیں جبکہ شام میں تین ہزار پانچ سو افراد جان سے گئے اور زخمیوں کی تعداد باون ہزار سے زائد ہوگئی۔
