کراچی : پی آئی اے کے باکمال لوگوں کی لاجواب سروس کا ایک اور مظاہرہ سامنے آیا ہے، عملے کی غفلت کے باعث لاہور سے کراچی آنے والے مسافر کا سامان جدہ پہنچ گیا۔
تفصیلات کے مطابق پی آئی اے انتظامیہ کی لاپرواہی کے سبب پرواز پی کے303پر مسافر اپنے قیمتی سامان سے محروم ہوگیا، پی آئی اے کی پرواز303لاہور سے کراچی آرہی تھی، مسافر سیٹ کے سامنے والے پاکٹ میں سامان رکھ کر بھول گیا تھا۔
اس حوالے سے ذرائع کا کہنا ہے کہ طیارہ لاہور سے آنے کے بعد بغیر سیکیورٹی چیک کے طیارہ جدہ روانہ کردیا گیا، ایئر لائن قواعد کے مطابق بیرون ملک جانے والی کسی بھی پرواز سے قبل سیکیورٹی عملہ جہاز کو چیک کرتا ہے۔
طیارے کی مکمل جانچ کے بعد پی آئی اےانجنیئرنگ ایئرکرافٹ کلیننگ کا عملہ طیارے کی صفائی کرتا ہے،سیکیورٹی عملہ کی جانب سے طیارے کو کلیئرقرار دینے کے بعد مسافروں کو بٹھانے کی اجازت دی جاتی ہے۔
ذرائع کے مطابق لاہور سے کراچی پہنچنے والی پرواز عجلت میں جدہ روانہ کردی گئی، مسافر کی جانب سے شکایت درج کرانے پرعملے نے مؤقف اختیار کیا کہ طیارہ تو جدہ روانہ ہوگیا ہے، طیارہ واپس آنے کے بعد آپ کا سامان چیک کیا جائے گا۔
واضح رہے کہ اس سے قبل بھی عملے کی جانب سے سامان بھول جانے کے واقعات رونما ہوتے رہے ہیں، پی آئی اے عملے کی غفلت اور لاپرواہی کی وجہ سے مسافر اپنے سامان سے محروم ہورہے ہیں۔