کراچی : امریکا میں پھنسے ہوئے پاکستانیوں کی وطن واپسی کا سلسلہ جاری ہے قومی ایئرلائن پی آئی اے نے امریکا کے لئے اپنی پانچویں پرواز کا اعلان کردیا جبکہ مصر میں پھنسے ہوئے ہم وطنوں کو لانے کیلئے پی آئی اے کی خصوصی پہلی پرواز مصر روانہ ہوگی۔
پی آئی اے ترجمان کے مطابق پی آئی اے امریکا کے شہر نیو جرسی کیلئے 31مئی کو خصوصی پرواز اسلام آباد سے روانہ ہوگی، نیو جرسی کے نیو آرک ائیرپورٹ سے اسلام آباد کیلئے پرواز یکم جون کو روانہ ہوگی۔
واشنگٹن میں قائم پاکستانی سفارت خانہ اور دیگر چار شہروں میں پاکستانی قونصل خانے پاکستانیوں کی رجسٹریشن کررہے ہیں جن کی رجسٹریشن ہو گئی ہے ان کو ان پروازوں پر ترجیح دی جائے گی۔
وہ امریکی شہری یا مستقل رہائشی جو پاکستان سے امریکہ اس خصوصی پرواز پر جانا چاہ رہے ہیں ان کو فوری طور پر پی ائی اے سے رجسٹریشن کی ہدایات کی گئی ہے۔
دوسری جانب مصر میں پھنسے پاکستانیوں کے لئے بھی اچھی خبر ہے کہ پی آئی اے کا مصر کے لئے پہلی مرتبہ فلائٹ آپریٹ کر نے کا اعلان کردیا، پی آئی اے کی خصوصی پرواز 27 مئی کو کراچی سے قاہرہ روانہ ہو گی، قاہرہ میں پھنسے 100 کے قریب ہم وطنوں کو لے کر کراچی پہنچے گی۔
