کراچی : پی آئی اے کی مالی رپورٹ میں رواں سال کے پہلے 3 ماہ میں 38 ارب روپے کے نقصان کا انکشاف ہوا جبکہ صرف 61 ارب روپے کی آمدنی کرسکا۔
تفصیلات کے مطابق قومی ایئرلائن پی آئی اے کی سال 2023 کے پہلے تین ماہ کے مالی نتائج سامنے آگئے، رپورٹ میں انکشاف کیا گیا کہ پی آئی اے کو رواں سال کے پہلے 3 ماہ میں 38 ارب روپے کا نقصان ہوا۔
رپورٹ میں بتایا گیا کہ گذشتہ سال 2022 کے اسی عرصے کے مقابلے پی آئی اے کا نقصان 171 فیصد زائد ہے جبکہ رواں سال کے پہلے تین ماہ کے دوران پی آئی اے صرف 61 ارب روپے کی آمدنی کرسکا۔
مالی رپورٹ میں کہنا تھا کہ پی آئی اے کو روپے کے مقابلے میں امریکی ڈالر کی قیمت بڑھنے سے 21 ارب روپے کا نقصان ہوا اور 2022 کے پہلے تین ماہ کے مقابلے 2023 میں کے خسارے میں 171 فیصد اضافہ ریکارڈ کیا گیا۔
رپورٹ کے مطابق تیل کی قیمت، شرح سود اور روپے کے مقابلے امریکی ڈالر کی قیمت بڑھنے سے پی آئی اے کو نقصان ہوا۔
رپورٹ میں بتایا گیا کہ انتظامی نااہلی سے پی آئی اے کے آپریٹنگ اخراجات 15 ارب روپے اضافہ کے بعد بڑھ کر 43 ارب روپے ہوگئی ہے۔
