اسلام آباد : وزیراعظم عمران خان نے کہا کہ مقبوضہ کشمیر کے عوام کی مدد یا جدوجہد کی حمایت کے لئے جو بھی ایل اوسی پار کرے گا تو وہ بھارتی بیانیے کے ہاتھوں میں کھیلے گا۔
تفصیلات کے مطابق وزیراعظم عمران خان نے سماجی رابطے کی ویب سائٹ ٹوئٹر پر اپنے بیان میں کہا کہ مقبوضہ کشمیرمیں جاری مظالم پرآزاد کشمیر کے عوام کاغصہ اورتکلیف سمجھ سکتاہوں، لیکن کشمیر کے عوام کی مدد یا جدوجہد کی حمایت کے لئے کوئی ایل اوسی پار کرے گا تو وہ بھارتی بیانیے کے ہاتھوں میں کھیلے گا۔
میں مقبوضہ کشمیر میں 2 ماہ سے جاری غیر
انسانی کرفیو میں گھرے کشمیریوں کے حوالے سے آزاد کشمیر کے لوگوں میں پایا جانے والا کرب سمجھ سکتا ہوں۔لیکن اہل کشمیر کی مدد یا جدوجہد میں انکی کی حمایت کی غرض سے جو بھی آزادکشمیر سے ایل او سی پار کرے گا وہ بھارتی بیانیے کے ہاتھوں میں کھیلےگا۔— Imran Khan (@ImranKhanPTI) October 5, 2019
عمران خان کا کہنا تھا کہ بھارت کشمیری جدوجہد کو اسلامی دہشت گردی قراردینےکی کوشش کرتاہے، بھارتی بیانیہ کشمیریوں پر مظالم سے توجہ ہٹانے کیلئے ہے، بھارت کو مقبوضہ کشمیر کے عوام پر مظالم بڑھانے اور ایل اوسی پار کرکے حملہ کرنے کا جواز ملے گا۔
وہ بیانیہ جس کے ذریعے پاکستان پر "اسلامی دہشت گردی” کا الزام لگا کر ظالمانہ بھارتی قبضے کیخلاف اہل کشمیر کی جائز جدوجہد سے توجہ ہٹانے کی کوشش کی جاتی ہے۔ایل او سی پار کرنے سے بھارت کو مقبوضہ وادی میں محصور لوگوں پر تشدد بڑھانے اور جنگ بندی لکیر کے اس پار حملہ کرنے کا جواز ملے گا۔
— Imran Khan (@ImranKhanPTI) October 5, 2019
واضح رہے مقبوضہ کشمیر میں کرفیو کو باسٹھ روز ہوگئے ہیں ، اسی لاکھ کشمیری بھارت کی ریاستی دہشت گردی کے باعث قیدیوں کی زندگی گزارنے پر مجبور ہیں، وادی میں دواؤں اورکھانے پینے کی اشیا کا بحران ہے جبکہ مواصلاتی بلیک آؤٹ ہے اور بھارتی فورسز چھاپوں میں نوجوانوں کو بلاجواز گرفتار کرکے بدترین تشدد کا نشانہ بنا رہی ہیں۔