The news is by your side.

Advertisement

اوگرا کی تجویز مسترد، وزیر اعظم نے پیٹرولیم مصنوعات کی نئی قیمتیں‌ مقرر کردیں

اسلام آباد: وزیراعظم عمران خان نے پیٹرولیم مصنوعات کی قیمتوں میں  اضافے کی منظوری دے دی۔

اے آر وائی نیوز کی رپورٹ کے مطابق آئل گیس اینڈ ریگولیٹری اتھارٹی (اوگرا) نے ماہِ فروری کے پندرہ روز کے لیے پیٹرولیم مصنوعات کی قیمتوں میں اضافے کی سمری ارسال کی تھی۔

وزیر اعظم کو بھیجی جانے والی سمری میں اوگرا نے پیٹرول کی فی لیٹر قیمت میں 13.18 روپے ، ہائی اسپیڈ ڈیزل میں 12.12 روپے، مٹی کے تیل کی قیمت میں 11.10 روپے فی لیٹر اور لائٹ ڈیزل کی قیمت میں 6.62 روپے فی لیٹر اضافے کی تجویز دی تھی۔

وزیرِ اعظم عمران خان نے پیٹرولیم مصنوعات کی قیمتوں میں اضافے کیلئے اوگرا کی جانب سے بھیجی گئی مجوزہ سفارشات کو مسترد کرتے ہوئے پیٹرلیم مصنوعات کی قیمتوں میں کم سے کم اضافے کی منظوری دی۔

مزید پڑھیں: پیٹرولیم مصنوعات کی قیمتوں میں اضافے کا امکان

وزیرِ اعظم عمران خان نے عوامی مفاد کے پیشِ نظر پیٹرول کی قیمت میں صرف 2.70 روپے فی لیٹر، ہائی سپیڈ ڈیزل میں 2.88 روپے فی لیٹر، مٹی کے تیل کی قیمت میں 3.54 روپے فی لیٹر اور لائٹ ڈیزل کی قیمت میں 3.00 روپے فی لیٹر کا اضافہ کرنے کی منظوری دے دی۔ پیٹرولیم مصنوعات کی نئی قیمتوں کا اطلاق آج رات بارہ بجے کے بعد سے پندرہ فروری تک ہوگا۔

واضح رہے کہ اوگرا کی جانب سے ہر پندرہ روز بعد پیٹرولیم مصنوعات کی قیمتوں میں اضافے کی سمری وزیراعظم ہاؤس ارسال کی جاتی ہے، جس کی قیمتوں پر وزیراعظم نظر ثانی کر کے نئی قیمتوں کی منظوری دیتے ہیں۔

اس سے قبل 15 جنوری سے اوگرا نے پیٹرول کی قیمت میں13 روپے فی لیٹر اضافے کی سفارش کی تھی لیکن وزیراعظم نے پیٹرول کی قیمت میں 3روپے 20پیسے فی لیٹر اضافے کی منظوری دی۔

Comments

یہ بھی پڑھیں