اسلام آباد: وزیر اعظم عمران خان نے میڈیا ورکرز کے تحفظ کے لیے اہم قدم اٹھاتے ہوئے 5 رکنی کمیٹی قائم کر دی۔
اے آر وائی نیوز کے مطابق ملک میں کرونا وائرس کی وبا کے دوران میڈیا انڈسٹری اور ورکرز کے تحفظ کے لیے اقدامات کے پیش نظر وزیر اعظم عمران خان نے 5 رکنی کمیٹی قائم کر دی ہے جو شفقت محمود، فردوس عاشق اعوان، شہزاد اکبر اور شہباز گل پر مشتمل ہوگی۔
اس کمیٹی کا قیام پاکستان براڈ کاسٹرز ایسوسی ایشن کی جانب سے وزیر اعظم عمران خان کو لکھے گئے خط کے بعد کیا گیا۔ پی بی سی اے نے خط کے ذریعے میڈیا انڈسٹری کے لیے حکومت کی براہ راست سپورٹ کی درخواست کی تھی۔
اے آر وائی نیوز کے مطابق قائم کردہ کمیٹی کو سفارشات کا جائزہ لینے اور مسائل کا حل نکالنے کا ٹاسک سونپ دیا گیا ہے۔ وزیر اعظم عمران خان کا کہنا تھا کہ کرونا وائرس کے درپیش چیلنج سے نمٹنے میں میڈیا کا کلیدی کردار ہے، کرونا وائرس کی صورت حال میں صحافی اور میڈیا ورکرز بھی ہر اول دستے کا کردار ادا کر رہے ہیں، ہم میڈیا ورکرز کا تحفظ، انڈسٹری کی مشکلات کم کرنے کی ہر ممکن کوشش کریں گے۔
خیال رہے کہ کرونا وائرس سے پیدا شدہ صورت حال میں لوگوں کی مدد کے لیے تشکیل دی جانے والی کرونا ریلیف ٹائیگر فورس میں بھی صحافیوں نے حصہ لیا اور خود کو رجسٹرڈ کیا ہے، اس سلسلے میں معاون خصوصی عثمان ڈار نے وزیر اعظم سے ملاقات کر کے کہا ہے کہ انجینئرز، اساتذہ، وکلا اور کارپوریٹ سیکٹر سے وابستہ افراد کے ساتھ ساتھ صحافیوں نے بھی رجسٹریشن میں حصہ لیا ہے۔
