ایبٹ آباد: پاکستان ملٹری اکیڈمی کی پاسنگ آؤٹ پریڈ کے دوران باصلاحیت افسران کو اعزازی شمشیر اور کمانڈنٹ کین سے نوازا گیا، تقریب کے مہمان خصوصی آرمی چیف جنرل قمر جاوید باجوہ تھے۔
تفصیلات کے مطابق پاک فوج کے شعبہ تعلقات عامہ آئی ایس پی آر کا کہنا ہے کہ پاکستان ملٹری اکیڈمی کی پاسنگ آؤٹ پریڈ کے دوران اکیڈمی کے سینیئر انڈر آفیسر محمد داؤد خان کو اعزازی شمشیر سے نوازا گیا۔
آئی ایس پی آر کا کہنا ہے کہ بٹالین سینیئر انڈر آفیسر شعیب اکمل کو پریذیڈنٹ گولڈ میڈل عطا کیا گیا، چیئرمین جوائنٹ چیفس آف اسٹاف کمیٹی اوور سیز گولڈ میڈل کمپنی سینیئر انڈر آفیسر جگت پوڈل کو ملا، جگت پوڈل کا تعلق نیپال سے ہے۔
چیف آف آرمی اسٹاف کین 34 ویں ٹیکنیکل گریجویٹ کورس کے انڈر آفیسر مدثر امین کو دی گئی، کمانڈنٹ کین 65 ویں انٹیگریٹڈ کورس کے انڈر آفیسر حیدر اعجاز کو عطا کی گئی۔
20 ویں لیڈی کیڈٹ کورس کا حصہ کورس انڈر آفیسر زنیرہ شفقت بھی کمانڈنٹ کین کی حقدار ٹھہریں، پانچویں ٹریننگ بیسک ملٹری کی کورس جونیئر انڈر آفیسرحرا عرفان کو بھی کمانڈنٹ کین سے نوازا گیا۔
