لاہور: نون لیگ اور پیپلزپارٹی کے قائدین کی ملاقات میں آدھی ٹرم کیلئے نون لیگ اورآدھی ٹرم کیلئے پیپلز پارٹی کاوزیراعظم لانے پر غور کیا گیا۔
تفصیلات کے مطابق پیپلز پارٹی اور مسلم لیگ ن کی قیادت کے درمیان ملاقات کا احوال سامنے آگیا، ذرائع نے بتایا کہ مسلم لیگ ن نے پیپلزپارٹی کو حکومت میں شامل ہونے کی پیشکش کی۔
ذرائع کا کہنا تھا کہ لیگی قیادت نے ایم کیو ایم ملاقات ،آزاد ارکان سے رابطوں سے آگاہ کیا، ملاقات میں لیگی وفد نے کہا کہ وزیراعظم مسلم لیگ ن کا ہوگا، جس پر آصف زرداری کا کہنا تھا کہ بلاول بھٹو کوپی پی سی ای سی وزیراعظم کا امیدوار نامزدکر چکی ہے۔
ملاقات میں آدھی ٹرم ن لیگ، آدھی ٹرم کیلئے پی پی کے وزیراعظم پر امکانات کا جائزہ لیا گیا جبکہ وفاق، پنجاب اور بلوچستان میں اتحادی حکومتیں بنانے پر اتفاق کرلیا گیا۔
ذرائع کے مطابق میثاق جمہوریت کی روشنی میں5سال کا روڈ میپ طے کرنے کی تجویز بھی دے دی گئی ، پیپلز پارٹی سی ای سی اجلاس میں تجاویز پر کل غور کیا جائے گا۔
