سڈنی : آسٹریلیا میں ساحل سمندر پر 157 دیوقامت ڈولفنز پھنس گئیں جنہیں بچانے کی کوششیں جاری ہیں۔
بین الااقوامی خبر رساں ایجنسی کے مطابق آسٹریلیا کے جنوبی جزیرے تسمانیہ کے دور دراز ساحل سمندر پر 157 ڈولفنز تشویشناک حالت میں پائی گئی ہیں جن میں سے 136 ابھی تک زندہ ہیں۔
رپورٹ کے مطابق تسمانیہ کے محکمہ ماحولیات نے کہا کہ بدھ کی صبح تک 21 پھنسے ہوئے ڈولفن مر چکے ہیں اور 136 ابھی تک زندہ ہیں۔
حکام نے بتایا کہ ان ڈولفنز کو فالز کلر وہیلز بھی کہا جاتا ہے جس کی وجہ ان کی کھوپڑیوں کی مشابہت ’اورکا‘ جیسی ہونا ہے۔
محکمہ ماحولیات نےبیان میں کہا کہ اس علاقے میں ناقابل رسائی، سمندری حالات اور ماہر آلات حاصل کرنے کےحوالے سے چیلنجزکا سامنا ہے۔
وائلڈ لائف ریسکیو ماہرین اور جانوروں کے ڈاکٹروں کی ایک ٹیم کو ڈولفن کا جائزہ لینے کے لیے روانہ کر دیا گیا ہے۔
ڈولفن تسمانیہ کے مغربی ساحل پر دریائے آرتھر کے قریب ایک ساحل پر پھنسے ہوئے تھے، یہ ایک بہت کم آبادی والا علاقہ ہے جو اس کی ہوا سے چلنے والی ساحلی پٹی کے لیے جانا جاتا ہے۔
یاد رہے کہ اس قبل سال 2018 میں بھی ساحل سمندر پر 150 دیوہیکل وہیل پھنس گئی تھیں برسات کے باعث سمندر کے درجہ حرارت میں ہونے والی تبدیلی سے بچنے کے لیے وہیل ساحل سمندر کا رخ کرتی ہیں۔
مزید پڑھیں : ساحل سمندر پر ہزاروں مردہ ڈولفنز کہاں سے آتی ہیں؟
علاوہ ازیں فرانس میں ہر سال بحر اوقیانوس کے ساحل پر سیکڑوں کی تعداد میں ڈولفنز مردہ پائی جاتی ہیں اس کے علاوہ یہ گمان بھی کیا جاتا ہے کہ ماہی گیروں کے جالوں میں پھنسنے والی اور ٹرالنگ کے باعث بھی ہزاروں ڈولفنز ہلاک ہوجاتی ہیں۔
بحر اوقیانوس کے ساحل پر ڈولفن کی ہلاکتوں میں سال 2022 میں اضافہ دیکھا گیا، صرف ماہ جنوری میں 127 عام ڈولفنز کو مردہ پایا گیا تھا جن کی تعداد پچھلے سال اسی مہینے میں 73 تھی۔
ڈولفنز کی اموات میں اضافے کا رجحان عام طور پر سال کے آخر میں دیکھا جاتا ہے، سال2022کے دوران 669ڈولفنز مردہ پائی گئیں جو سال 2020میں1,299 سے کم ہے۔
