The news is by your side.

کراچی کے مختلف علاقوں میں پولیس مقابلے، 6 ملزمان گرفتار، واردات کی فوٹیج بھی سامنے آ گئی

کراچی: شہر قائد کے مختلف علاقوں میں پولیس مقابلوں میں 6 ملزمان کو گرفتار کیا گیا ہے، ملزمان کی ایک واردات کی فوٹیج بھی سامنے آ گئی ہے۔

تفصیلات کے مطابق کورنگی انڈسٹریل ایریا پولیس نے مہران ٹاؤن اے ٹی سی کٹ پر گزشتہ روز 3 ملزمان قاسم، عمیر اور دانیال کو مقابلے کے بعد گرفتار کیا تھا، تینوں ملزمان مطلوب نکلے۔

لٹیروں کی واردات کرتے وقت کی سی سی ٹی وی فوٹیج بھی سامنے آ گئی ہے، جس میں دیکھا جا سکتا ہے کہ گلی میں جاتے 2 نوجوان جیسے ہی رکے لٹیرے آ پہنچے۔

ایک لٹیرے نے پستول نکالا تو نوجوان ڈر گیا اور ہاتھ کھڑے کر دیے، لٹیرے دونوں نوجوانوں کی ایک منٹ تک تلاشی لیتے رہے، اور لوٹ مار کے بعد دونوں دوسری جانب فرار ہو گئے۔

ادھر کراچی کے علاقے عوامی کالونی کی پولیس کا ڈکیت کے ساتھ مبینہ مقابلہ ہوا، جس میں فائرنگ کے تبادلے میں ڈکیت زخمی حالت میں گرفتار ہو گیا۔

پولیس حکام نے دعویٰ کیا ہے کہ ملزم جلیبی چوک کورنگی نمبر 6 کے قریب چھینا جھپٹی کی نیت سے گھوم رہا تھا، گرفتار زخمی ملزم کی شناخت محمد اویس کے نام سے کی گئی ہے، ملزم سے اسلحہ، دو چھینے ہوئے موبائل فون اور موٹر سائیکل بھی برآمد ہوئی۔

کراچی کے علاقے سپر ہائی وے جنجال گوٹھ میں پولیس مقابلے میں اسٹریٹ کرائم کی 2 سو سے زائد وارداتوں میں ملوث ملزم کو ساتھی سمیت زخمی حالت میں گرفتار کیا گیا۔

پولیس حکام کا کہنا ہے کہ زخمی ملزمان عمران اور کاشف عادی جرائم پیشہ ہیں، ملزم عمران کئی دفعہ گرفتار ہو کر جیل بھی جا چکا ہے، جب کہ ملزم کاشف کراچی کے مختلف علاقوں میں ڈکیتوں کا گروپ چلاتا ہے۔

Comments

یہ بھی پڑھیں