اسلام آباد: آصف علی زرداری نے بلوچستان میں سیاسی چالوں کا آغاز کر دیا، صوبے کے بڑے الیکٹیبلز سے رابطے شروع ہو گئے۔
ذرائع کے مطابق پاکستان پیپلز پارٹی نے مشن بلوچستان میں سیاسی جوڑ توڑ شروع کر دی ہے، آصف زرداری اس جوڑ توڑ کی نگرانی خود کر رہے ہیں۔
پی پی ذرائع نے بتایا کہ نواب ثنا اللہ زہری نے الیکٹیبلز کو قیادت کا پیغام پہنچا دیا ہے، اس سلسلے میں بلوچستان کے 5 الیکٹیبلز کو پی پی میں شمولیت کی دعوت دی گئی ہے، مذکورہ الیکٹیبلز کا تعلق بلوچستان عوامی پارٹی اور پی ٹی آئی سے ہے۔
پیپلز پارٹی نے سردار یار محمد رند، عمر خان جمالی، خالد لانگو، سردار صالح بھوتانی، اور جان محمد جمالی کو پارٹی میں شمولیت کی دعوت دی ہے، جنھوں نے دعوت پر غور کے لیے وقت مانگ لیا ہے۔
ذرائع کے مطابق پیپلز پارٹی بلوچستان کے مزید الیکٹیبلز سے جلد رابطے کرے گی، پی پی سابق وزیر اعلیٰ بلوچستان عبدالقدوس بزنجو سے بھی رابطے میں ہے، تاہم عبدالقدوس بزنجو نے پی پی میں شمولیت کا کوئی فیصلہ نہیں کیا ہے۔
