The news is by your side.

Advertisement

کراچی میں کاروبار کی جلد بندش کیخلاف سیاسی جماعتیں میدان میں آگئیں

کراچی: شہر قائد میں کاروبار کی جلد بندش کے خلاف سیاسی جماعتیں تاجروں کی حمایت میں سامنے آگئیں۔

اے آر وائی نیوز کی رپورٹ کے مطابق کراچی میں بازاوں کی جلد بندش پر ایم کیو ایم پاکستان نے مزاحمتی تحریک چلانے کا اعلان کردیا، جماعت اسلامی نے بھی کاروبار کے اوقات کار کے حوالے سے تاجروں کی حمایت کردی۔

ایم کیو ایم پاکستان کے کنوینر خالد مقبول صدیقی کا کہنا ہے کہ پولیس کو متنبہ کرتا ہوں تاجروں کو ہراساں نہ کرے، پیپلزپارٹی کراچی والوں کو دیواروں میں چُن رہی ہے۔

خالد مقبول صدیقی نے کہا کہ اب احتجاج کا نہیں تحریک کا وقت ہے، وفاق کا کام صرف اعلان کرنا نہیں کہ اختیار نہیں ہیں، کراچی کو خصوصی درجہ دینے کے لیے قانون سازی کی جائے۔

مزید پڑھیں: کراچی کے تاجروں کا جمعہ کو مارکیٹیں اور دکانیں کھولنے کا اعلان

دوسری جانب جماعت اسلامی کے رہنما حافظ نعیم الرحمان کا کہنا ہے کہ ملک بھر کاروباری اوقات کار رات 8 بجے تک لیکن کراچی میں 6 بجے تک مقرر کرنا قابل مذمت ہے، اوقات کار میں کمی سے رش میں اضافہ ہی ہوگا جو کورونا پھیلنے کا سبب بن سکتا ہے۔

حافظ نعیم الرحمان نے کہا کہ لاک ڈاؤن کے نقصانات کا ازالہ ابھی تک نہیں ہوسکا ہے، کاروبار کی مزید بندش سے معیشت کو بھی نقصان پہنچے گا۔

انہوں نے کہا کہ کاروبار کھولنے کی اجازت رات 8 بجے تک دی جائے اور تعطیلات میں بھی کمی کی جائے، حافظ نعیم نے مطالبہ کیا کہ سندھ حکومت اوقات کار میں فی الفور تبدیلی کا اعلان کرے، تاجروں کو احتجاج پر مجبور نہ کیا جائے۔

Comments

یہ بھی پڑھیں