روم: نہایت مہلک کرونا وائرس سے جہاں دنیا بھر کے انسانوں کو خطرات لاحق ہو گئے ہیں وہاں اب تک اس وائرس سے کچھ اہم شخصیات بھی متاثر ہوئیں۔
غیر ملکی میڈیا کے مطابق یورپی ملک اٹلی میں پوپ فرانسس کا بھی کرونا وائرس کا ٹیسٹ کیا گیا جو نیگٹو آیا، پوپ فرانسس نے طبیعت خراب ہونے کے باعث ٹیسٹ کرایا تھا۔
غیر ملکی میڈیا کا کہنا ہے کہ پوپ نے گزشتہ ہفتے طبیعت خراب ہونے کے باعث تقریبات بھی منسوخ کر دی تھیں، شک ہونے پر انھوں نے کرونا کا ٹیسٹ کروایا، جس کے نتیجے سے معلوم ہوا کہ انھیں کرونا لاحق نہیں ہوا۔
دنیا بھر میں کرونا وائرس سے اموات کی تعداد 3120 ہو گئی
یکم مارچ کو پوپ فرانسس جب ویٹی کن میں معمول کے مطابق خطاب کر رہے تھے تب انھیں کھانسی ہوئی تھی، معلوم ہوا کہ وہ نزلہ زکام میں مبتلا ہو گئے ہیں، جس کی وجہ سے انھوں نے پہلی بار مذہبی تقریب منسوخ کی۔
خیال رہے کہ 83 سالہ پوپ کے ایک پھپھڑے کا کچھ حصہ کئی عشرے قبل ایک بیماری کی وجہ سے کاٹا بھی گیا تھا۔ پوپ فرانسس اب ایک ایسے وقت میں بیمار پڑے ہیں جب اٹلی نہایت مہلک وائرس COVID 19 سے نبردآزما ہے، وائرس سے اموات کی تعداد 52 ہو چکی ہے، جب کہ گزشتہ روز اموات 34 تھیں۔
ایرانی سپریم لیڈر کے مشیر کرونا وائرس سے انتقال کر گئے
کرونا وائرس سے اٹلی یورپ کا سب سے زیادہ متاثرہ ملک ہے، اب تک متاثرہ افراد کی تعداد 2,036 تک پہنچ چکی ہے، اور مزید نئے کیسز تیزی سے سامنے آ رہے ہیں۔
ادھر جنوبی کوریا میں کرونا وائرس سے متاثرین کی تعداد 5,186 ہو گئی ہے، جنوبی کوریا میں وائرس نے 31 فوجی اہل کاروں کو بھی متاثر کر دیا ہے۔
