اسلام آباد: اوگرا نے پیٹرولیم مصنوعات کی قیمتوں کے حوالے سے سمری تیار کرلی، جس کے تحت قیمتوں میں کمی کا امکان ہے۔
تفصیلات کے مطابق پیٹرولیم مصنوعات کی نئی قیمتوں کااعلان آج کیا جائے گا، اوگرا نے حکومت کو بھیجنے کیلئے سمری تیار کرلی، سمری آج شام حکومت کو بھیجی جائے گی۔
عالمی منڈیوں میں خام تیل قیمتوں میں اضافہ دیکھا جا رہا ہے، ڈالر کے مقابلے میں روپے کی بہتر قدر کی وجہ سے مارکیٹ ذرائع پیٹرولیم مصنوعات کی قیمتوں میں معمولی کمی کا امکان ظاہر کر رہے ہیں۔
وفاقی حکومت آج رات پیٹرولیم کی قیمتوں میں ردوبدل کا اعلان کرے گی، قیمتوں کا اطلاق یکم دسمبر 2023 سے ہوگا۔
خیال رہے 16 نومبر کو حکومت نے پیٹرولیم مصنوعات کی قیمتوں میں کمی کا اعلان کیاتھا، پیٹرول کی قیمت 2 روپے 4 پیسے فی لیٹر کمی کی گئی تھی،جس کے بعد پیٹرول کی فی لیٹر نئی قیمت 281 روپے 34 پیسے ہوگئی تھی جبکہ ہائی اسپیڈ ڈیزل کی قیمت میں 6 روپے 47 پیسے فی لیٹر کمی کے بعد نئی قیمت فی لیٹر 296 روپے 71 پیسے ہوگئی تھی۔