کراچی: ملک میں گذشتہ شب ہونے والے بجلی کے بریک ڈاؤن نے ملک میں نظام زندگی کو بری طرح متاثر کردیا ہے، بجلی کی عدم فراہمی کے نتیجے میں کراچی کو پانی کی سپلائی بھی معطل ہوگئی ہے۔
تفصیلات کے مطابق رات گئے ہونے والے بریک ڈاؤن کا مرحلہ وار بحالی کا سلسلہ شروع ہوگیا ہے تاہم کراچی کو پانی کی ضروریات فراہم کرنے والی دھابیجی پمپنگ اسٹیشن پر بجلی بحال نہ ہوسکی ہے، بجلی کے بریک ڈاؤن کے باعث دھابیجی پمپنگ اسٹیشن کےتمام انیس پمپ بند پڑے ہیں، جس کے باعث کراچی کو تین کروڑ گیلن سے زائدپانی کی فراہمی معطل ہوگئی ہے۔
پانی کی فراہمی معطل ہونے سے کراچی میں پانی بحران کا خدشہ پیدا ہوگیا ہے۔
دوسری جانب ترجمان کے الیکٹرک کی جانب سے جاری بیان میں کہا گیا ہے کہ شہر کے مختلف علاقوں میں مرحلہ واربجلی بحالی کا کام جاری ہے، جیكب لائن، گارڈن ایسٹ ، ڈیفنس، نارتھ کراچی، شارع فیصل، سوسائٹی، شاہ فیصل ،بلوچ کالونی کے کچھ مقامات پربجلی بحال کردی گئی ہے۔
یہ بھی پڑھیں: آئندہ چند گھنٹوں میں ملک بھر میں بجلی بحال ہوجائے گی، عمرایوب
ترجمان کے مطابق پہلے مرحلے میں پمپنگ اسٹیشنز، اسپتال کیلئے بجلی کی بحالی کوترجیح دی جا رہی ہے، کے الیکٹرک ترجمان نے دعویٰ کیا کہ دھابیجی پمپنگ اسٹیشن پر بجلی بحال کی چکی ہے جبکہ کےڈبلیو ایس بی کے باقی متاثرہ اسٹیشنز پر بھی بجلی بحالی کا عمل جاری ہے۔
