کراچی : پیپلز پارٹی نے ن لیگ سے پنجاب سمیت دیگر صوبوں میں سیٹیں مانگ لیں، اس حوالے سے ذرائع کا کہنا ہے کہ الیکشن کی تاریخ بھی یہی دونوں جماعتیں فائنل کریں گی۔
ذرائع کے مطابق پیپلزپارٹی نے کچھ حلقوں میں ن لیگ کو اس کے امیدوار کھڑے نہ کرنے کا مطالبہ کیا ہے جس میں گیلانی خاندان، پرویزاشرف، قمرزمان کائرہ، ندیم افضل چن کے حلقےشامل ہیں۔
اس کے علاوہ پیپلزپارٹی اور ن لیگ رہنماؤں کی ملاقاتوں میں نگراں وزیراعظم کے ناموں پر مشاورت کی جائے گی، پیپلزپارٹی نگراں وزیر اعظم کے لیے مشترکہ نام دینے پر زور دے رہی ہے۔
ذرائع کے مطابق ملاقاتوں میں قومی اسمبلی وقت سے پہلے تحلیل کرنے پر بھی مشاورت کی جائے گی، دونوں جماعتیں الیکشن تاریخ بھی اسی ملاقات کے دوران فائنل کریں گی۔
ذرائع کا کہنا ہے کہ مذکورہ مشاورت کو وسیع کرنے پر اتفاق کیا گیا ہے جس کے بعد مولانا فضل الرحمان بھی مشاورت کا حصہ بنیں گے۔
اس سلسلے میں ن لیگ اور پیپلزپارٹی کے مزید رہنماؤں کی دبئی روانگی کا قوی امکان ہے، جن میں حمزہ شہباز ،احسن اقبال، سعد رفیق، ایاز صادق، امیر مقام خورشید شاہ، قمر زمان کائرہ، شیریں رحمان، نوید قمر، یوسف رضا گیلانی کی دبئی روانگی کا امکان ہے۔
