دبئی : پیپلزپارٹی کے شریک چیئرمین آصف زرداری نے اہم میٹنگ کیلئے وزیراعلیٰ سندھ قائم علی شاہ سمیت دیگررہنماؤں کو دبئی طلب کرلیا ہے۔
تفصیلات کے مطابق پیپلزپارٹی کے شریک چیئرمین آصف زرداری نے وزیراعلیٰ سندھ قائم علی شاہ کو فوری طور پر دبئی طلب کیا ہے، ذرائع کے مطابق وزیراعلیٰ سندھ آج دوپہر دبئی روانہ ہوں گے۔
ذرائع کا کہنا ہے کہ آصف زرداری اور وزیراعلی سندھ کی ملاقات میں سندھ کی سیاسی صورتحال،حکومتی امورپرگفتگو کی جائے گی جبکہ وزیرِاعلیٰ سندھ ڈاکٹر عاصم حُسین کی گر فتاری بعد سے اب تک کی صورتحال پر بریفنگ دیں گے۔
دوسری جانب سابق صدر نے فاروق ایچ نائیک ، فریال تالپور اور وزیرِداخلہ سندھ سہیل انورسیال کو بھی دبئی طلب کیا ہے، ملاقات میں صوبے کی سیاسی صورتحال اوربلدیاتی انتخابات کی تیاریوں پربھی بات ہوگی۔
واضح رہے کہ وزیرِ اعظم نے 10 ستمبر کو ایپکس کمیٹی کا اجلاس طلب کرلیا ہے ، جس میں آرمی چیف سمیت، چاروں صوبوں کے وزرائے اعلیٰ بھی شریک ہونگے۔
یاد رہے کہ جب سےسندھ میں کرپٹ افراد کیخلاف مہم کا آغاز ہوا ہے، پیپلزپارٹی کی اعلیٰ قیادت نے اپنا آپریشنل ہیڈکوارٹر د بئی کوبنالیا ہے، جہاں آصف زرداری بذات خود موجود ہیں ۔
دوسری جانب ڈاکٹر عاصم کے بارے میں یہ خبریں بھی گردش کررہی ہیں کہ اُنہوں نے اپنی رہائی کے عوض سیکورٹی اداروں کو ایک خطیر رقم قومی خزانےمیں جمع کرانے کی پیشکش کی ہے۔
