کراچی : پاکستان پیپلزپارٹی نے ملک بھر میں آئین کے مطابق عام انتخابات کرانے کیلئے الیکشن کمیشن سے انتخابات کی تاریخ دینے کے اعلان کا مطالبہ کیا ہے۔
اس حوالے سے پیپلز پارٹی کے رہنما فیصل کریم کنڈی کا کہنا ہے کہ پارٹی اس بات پر یقین رکھتی ہے کہ آئین کے مطابق آزادانہ اور منصفانہ عام انتخابات کے لیے تمام اسمبلیوں کے انتخابات ایک ہی دن کرائے جائیں۔
انہوں نے اس بات کا بھی اعادہ کیا کہ آئین کے مطابق عام انتخابات کی تاریخ کے اعلان میں کسی قسم کی تاخیر نہ کی جائے اور الیکشن کا شیڈول فوری طور پر دیا جائے۔
پی پی رہنما نے کہا کہ الیکشن کمیشن کے شیڈول دینے سے پہلے افسران کے تبادلے سمجھ سے بالاتر ہیں، حلقہ بندیوں کا فیصلہ ہوا نہیں ہے پہلے سےالیکشن کمیشن احکامات دے رہا ہے۔
ان کا مزید کہنا تھا کہ نگران حکومت کو بھی شفاف اور منصفانہ انتخابات کرانے کی کوشش کرنی چاہیے تاکہ کوئی اس کے نتائج پر انگلی نہ اٹھا سکے۔
