لاہور : پیپلزپارٹی کے رہنما ندیم افضل چن کا کہنا ہے کہ وفاق اور پنجاب کی بیوروکریسی کا گٹھ جوڑ ہے، پنجاب میں بیوروکریسی ن لیگ کی ہے، اسی کی زیادہ چل رہی ہے۔
تفصیلات کے مطابق پیپلزپارٹی کے رہنما ندیم افضل چن نے اے آر وائی نیوز کو خصوصی انٹرویو دیتے ہوئے کہا کہ سنجیدگی سے سوچ رہا ہوں، سیاست چھوڑ دوں، جمہوریت،رول آف لا اورلوگوں کے لیے کچھ کرنہیں پا رہا۔
ندیم افضل چن کا کہنا تھا کہ محسن نقوی بےبس ہیں،تگڑےوزیراعلیٰ نہیں، پنجاب میں بیوروکریسی کی زیادہ چل رہی ہے اور یہ ساری ن لیگ کی ہے، ساری بیورو کریسی کو ہدایات ہیں کہ صرف ن لیگ کے کام کرنے ہیں، اس وقت وفاقی حکومت اورپنجاب کی بیوروکریسی کا گٹھ جوڑ ہے۔
والد کی گرفتاری سے متعلق پی پی رہنما نے بتایا کہ والدپرکوئی مقدمہ نہ تھا،سیاست چھوڑےبھی15سال ہوگئے، پولیس والے میرےبھائی کا پوچھ رہےتھے پھر والدصاحب کو لےگئے، شاید اس کی ایک وجہ پی پی کی میٹنگ میں پی ٹی آئی سے اتحاد کی بات کرنا تھی۔
ان کا کہنا تھا کہ میں نےپارٹی میٹنگ میں کہا تھا کہ پی ٹی آئی سے اتحاد کا پنجاب میں زیادہ فائدہ ہوگا، اب توہربات ریکارڈہوجاتی ہے، اس لئے میری یہ بات بھی حکومت تک پہنچی ہوگی۔
ندیم افضل چن نے کہا کہ میرا تو پیپلزپارٹی کی قیادت کو یہی مشورہ ہے عوام کےساتھ کھڑے ہوں۔
انتخابات کے حوالے سے پی پی رہنما کا کہنا تھا کہ پیپلزپارٹی کی میٹنگ میں اکثریت نے اکتوبر میں الیکشن کےحق میں رائےدی، پیپلزپارٹی تو وقت پر انتخابات چاہتی ہے لیکن دوسری اتحادی جماعتیں الیکشنز نہیں چاہتیں۔
انھوں نے کہا کہ اس وقت پنجاب میں اینٹی نوازووٹ بہت زیادہ ہے، پی ٹی آئی یا پیپلزپارٹی میں سے جس کا امیدوار اچھا ہوا وہ اینٹی نواز ووٹ لے گا۔
استحکام پارٹی کے حوالے سے سوال پر ندیم افضل چن کا کہنا تھا کہ استحکام پارٹی میں اکثریت وہ ہیں جنکی عوام میں وقعت نہیں، کابینہ میں جب شہزاد اکبر کےخلاف بولا تو یہ سارے میرے خلاف ہوگئے، جو آج استحکام کے ساتھ ہیں وہ اسوقت عدم استحکام کے ساتھ تھے۔
پی ٹی آئی کے رہنماؤں کی جانب سے پارٹی چھوڑنے کے سوال پر پی پی رہنما نے جواب دیا کہ میں نے 3 سال پہلے تحریک انصاف چھوڑ دی لیکن ابھی ہوتا تو نہ چھوڑتا، جس طرح پی ٹی آئی لیڈرزبھاگ رہےہیں میں نہ بھاگتا۔
پرویز الہی کی گرفتاری پر ان کا کہنا تھا کہ پرویزالہٰی کے ساتھ ان کی عمر اور بیماری کےحساب سے ایسا سلوک نہیں ہونا چاہیے۔
