اسلام آباد: پاکستان پیپلز پارٹی اور مسلم لیگ ن کے درمیان پنجاب کے حوالے سے ایک اہم معاہدہ ہوا ہے، پی پی ذرائع کے مطابق یہ تحریری معاہدہ صوبہ پنجاب کے امور سے متعلق ہے۔
ذرائع کا کہنا ہے کہ پی پی اور ن لیگ کے مابین یہ تحریری معاہدہ مرکز میں حکومت سازی کے دوران دونوں پارٹیوں کی باہمی رضا مندی سے ہوا تھا، جس کا مقصد اعتماد سازی کی فضا بنانا تھا۔
اس معاہدے پر پی پی اور ن لیگی مذاکراتی کمیٹیوں کے اراکین کے دستخط ہیں، تحریری معاہدے کی نقول ن لیگ اور پیپلز پارٹی قیادت کے پاس ہے۔
معاہدے کے تحت ن لیگ پنجاب میں پیپلز پارٹی کو اسپیس دینے کی پابند ہوگی، ن لیگ پنجاب میں پی پی ورکرز کا خیال رکھے گی، پنجاب میں بلدیاتی الیکشن رواں سال کرائے گی، اور صوبے میں بھرتیاں میرٹ پر کرائی جائیں گی۔
معاہدے کے رو سے پنجاب میں پی پی مخالف انتظامی افسران تعینات نہیں ہوں گے، پنجاب کے مخصوص اضلاع میں تعیناتیاں پی پی کی مشاورت سے ہوں گی، اور پی پی کے اراکین پنجاب اسمبلی کو یکساں ترقیاتی فنڈز جاری ہوں گے۔
