مکہ مکرمہ : سعودی عرب میں عمرہ زائرین کےاستقبال کی تیاریاں شروع کردی گئیں، مکہ میں 2 لاکھ اورمدینہ میں 70ہزار کمرے عمرہ زائرین کے لیے مختص کردیئے گئے ہیں۔
تفصیلات کے مطابق مکہ مکرمہ اور مدینہ منورہ کےہوٹلوں میں عمرہ زائرین کے استقبال کی تیاریاں جاری ہے ، حج و عمرہ و زیارت قومی کمیٹی رکن ہانی العمیری نے اپنے بیان میں کہا ہے کہ مکہ میں 2 لاکھ اورمدینہ میں 70ہزارکمرےعمرہ زائرین کے لیے مختص کردیئے گئے ہیں۔
حکام کا کہنا تھا کہ کہ ہوٹل،ٹاورزصفائی ضوابط کی مکمل پابندی رکھیں گے اور ہوٹل میں عمرہ زائرین کے ہرگروپ کے استقبال کےلیےملازم تعینات ہو جبکہ مشکوک مسافروں کو الگ ٹھہرانے کےلیےالگ کمرے ہوں۔
قومی کمیٹی رکن نے کہا کہ اس بات کو یقینی بنایا جائے کہ کسی بھی کمرے میں 2 سے زیادہ افراد نہ ہوں۔
یاد رہے سعودی عرب نے غیر ملکی زائرین کے لیے عمرہ کھولنے کا اعلان کرتے ہوئے کہا تھا کہ یکم محرم الحرام 1443 ہجری سے غیر ملکی عازمین کو عمرہ ادائیگی کی اجازت ہوگی۔
حکام کا کہنا تھا کہ زائرین ایس او پیزکے تحت سعودی عرب پہنچیں گے، جس کے لیے سعودی عرب کی منظور شدہ ویکسین کی دونوں خوراکیں لگوانا لازمی ہوگا۔
خیال رہے وزارتِ حج و عمرہ نے درخواست دینے کے طریقہ کار کے حوالے سے ابھی وضاحت نہیں کی، اس حوالے سے جلد طریقہ کار کا اعلان کیا جائے گا۔
