صدرِ مملکت کا قیدیوں کی سزاؤں میں خصوصی چھوٹ کا اعلان

اسلام آباد: صدر مملکت عارف علوی نے یوم پاکستان کے موقع پر قیدیوں کی سزاؤں میں خصوصی چھوٹ کا اعلان کردیا۔

تفصیلات کے مطابق صدر مملکت عارف علوی نے یوم پاکستان کے موقع پر قیدیوں کی سزاؤں میں 90 روز کی کمی کی منظوری دے دی۔

صدر مملکت میں سزاؤں میں کمی کی منظوری آئین کے آرٹیکل 45 کے تحت دی، سزاؤں میں کمی کا اطلاق قتل ، جاسوسی ،ریاست مخالف سرگرمیوں کے قیدیوں پر نہیں ہوگا۔

اس کے علاوہ زنا، چوری، ڈکیتی ، اغوا اور دہشت گردی میں سزایافتہ مجرموں ، مالی جرائم اور قومی خزانے کو نقصان پہنچانیوالے مجرموں پر بھی سزا میں کمی کا اطلاق نہیں ہوگا۔

سزاؤں میں کمی کے فیصلے کا اطلاق 65 سال سے زائد عمر کے مرد قیدیوں اور 60 سال سے زائد عمر کی خواتین قیدی پر ہوگا جبکہ 18 سال سے کم عمر قیدی جو ایک تہائی سزا کاٹ چکے ان پر بھی کمی کا اطلاق ہوگا۔

Comments