اسلام آباد : صدارتی انتخاب کے لئے اسپیکر قومی اسمبلی ایاز صادق نے پارلیمنٹ کامشترکہ اجلاس 9 مارچ کوطلب کرلیا۔
تفصیلات کے مطابق اسپیکر قومی اسمبلی ایاز صادق نے پارلیمنٹ کا مشترکہ اجلاس نو مارچ کوطلب کرلیا، اجلاس میں نئے صدر کاانتخاب کیا جائے گا۔
یاد رہے الیکشن کمیشن آف پاکستان نے صدارتی انتخابات کے شیڈول کا اعلان کیا تھا، شیڈول کے مطابق صدارتی انتخاب کے لیے پولنگ 9 مارچ کو صبح 10 بجے سے شام 4 بجے تک ہوگی۔
مسلم لیگ ن، پیپلز پارٹی، مسلم لیگ (ق)، ایم کیو ایم پی، آئی پی پی، بی اے پی، مسلم لیگ ضیاء اور نیشنل پارٹی پر مشتمل اتحاد نے آصف علی زرداری کو صدر کے عہدے کے لیے نامزد کیا تھا۔
دریں اثنا، پی ٹی آئی اور سنی اتحاد کونسل (ایس آئی سی) نے پشتونخوا ملی عوامی پارٹی کے سربراہ محمود خان اچکزئی کو اس نشست کے لیے نامزد کر دیا۔
336 میں سے اتحاد کے پاس اب تک قومی اسمبلی میں 209 نشستیں ہیں جب کہ اپوزیشن جماعتوں کے پاس 104 ارکان ہیں۔
