اسلام آباد : وزیراعظم شہباز شریف دورہ متحدہ عرب امارات میں 2 ارب ڈالر قرض موخر کرنے کی درخواست کریں گے۔
تفصیلات کے مطابق وزیراعظم شہباز شریف کے 2 روزہ دورہ متحدہ عرب امارات کے دوران پاکستان اور متحدہ عرب امارات کے مابین 2 ارب ڈالر قرض موخر کرنے پر گفتگو ہوگی۔
ذرائع نے بتایا ہے کہ پاکستان نے آئندہ چند ہفتوں میں 2 ارب ڈالر قرض امارات کو ادا کرنا ہے۔
، ذرائع کا کہنا ہے کہ امارات کا پاکستان کو اقتصادی بحران سے نکالنے کے لیے امدادی پیکج بھی متوقع ہے ، دورے کے دوران امارات کے 2 ارب ڈالر کی سرمایہ کاری کے وعدے کو عملی شکل دینے پر مشاورت ہوگی۔
اس کے علاوہ متحدہ عرب امارات کے ساتھ مختلف شعبہ جات میں مزید سرمایہ کاری پر بھی گفتگو ہوگی جبکہ دونوں ممالک کے درمیان باہمی تجارتی حجم بڑھانے پر بھی کلیدی پیشرفت کا امکان ہے۔
ذرائع کے مطابق پاکستانی ہنر مند ،تعلیم یافتہ افرادی قوت کی کھپت اور مواقع کی فراہمی پر زور دیا جائے گا اور ساتھ ہی اماراتی تاجروں، سرمایہ کاروں کو پاکستان میں کاروبار، مزید سرمایہ کاری پر راغب کیا جائے گا۔
