ریاض: سعودی فرمانروا شاہ سلمان بن عبدالعزیز نے شاہی خاندان کی شہزادی ریما بنت بندر کو امریکا میں سفیر مقرر کیا ہے انہیں سعودی عرب میں وزیر کا پروٹوکول حاصل ہوگا۔
عرب میڈیا کے مطابق شہزادی ریما بنت بندر کو امریکا میں تعینات شہزادہ خالد بن سلمان کی جگہ سفیر مقرر کیا گیا ہے، شہزادہ خالد بن سلمان کو سعودی عرب میں نائب وزیر دفاع مقرر کیا گیا ہے۔
شہزادی ریما 24 اکتوبر 1983 کو امریکا میں اپنے والد شہزادہ بندر بن سلطان کے ہمراہ واشنگٹن میں سعودی سفارت خانے میں داخل ہوئیں، شہزادی ریما کے والد نے 22 سال تک دونوں ملکوں کے اہم تاریخی ادوار میں سفارت کاری کے فرائض انجام دئیے۔
امریکا میں قیام کے دوران شہزادی ریما نے سفارتی آداب و رموز اپنے والد شہزادہ بندر سلطان سے سیکھے یہی وجہ ہے کہ انہوں نے مختلف شعبہ ہائے زندگی میں کامیابی کے ساتھ خدمات انجام دیں، ان کی جرأت ہمت اور سفارتی رموز سے آگاہی کی بنا پر امریکا جیسے طاقت ور ملک میں انہیں سفیر مقرر کیا گیا۔
مزید پڑھیں: سعودی عرب کی پہلی خاتون سفیر امریکا میں تعینات
شہزادی ریما متعدد سرکاری اسپورٹس کمیٹیوں کی سربراہ رہنے والی پہلی سعودی خاتون ہیں، انہوں نے تعلیمی اداروں میں بچیوں کے لیے اسپورٹس کی تعلیم متعارف کرائی اور خواتین کو کھیلوں میں اپنی صلاحیتوں کا لوہا منوانے کی ترغیب دی۔
شہزادی ریما نے امریکا میں سفیر مقرر کیے جانے پر سعودی فرمانروا اور ولی عہد شہزادہ محمد بن سلمان کی طرف سے اعتماد کا اظہار کرنے پر ان کا دل کی گہرائیوں سے شکریہ ادا کرتے ہوئے کہا کہ وہ امریکا میں پوری ذمہ داری کے ساتھ اپنے فرائض انجام دیں گی اور سفارتی محاذ پر سعودی عرب کا ہر ممکن دفاع کریں گی۔
