بھارتی فلم انڈسٹری کے اب تک کنوارے ہیرو سلمان خان کو ایک خاتون نے منفرد انداز میں شادی کی آفر کی جس پر دبنگ اسٹار بھی فوری دلچسپ جواب بھی دے دیا۔
تیس سال سے زائد عرصے سے بالی ووڈ انڈسٹری پر راج کرنے والے اداکار سلمان خان اب تک کنوارے ہیں ان کا کیریئر کے دوران کئی ساتھی اداکاراؤں کے ساتھ نام جوڑا گیا لیکن حقیقی زندگی کی جوڑی نہ بن سکی۔ سلمان خان چاہنے والے اتنے ہیں کہ انہیں اب تک شادی کی آفرز ملتی رہتی ہیں۔
گزشتہ روز ابوظہبی کے یاس آئی لینڈ میں آئیفا ایوارڈ کی رنگا رنگ تقریب ہوئی جہاں بالی ووڈ کے دیگر ستاروں کے درمیان سلمان خان بھی سب کی نگاہوں اور توجہ کا مرکز بنے رہے۔
آئیفا راکس 2023 کے گرین کارپٹ پر واک کرتے ہوئے دبنگ اسٹار میڈیا سے بات چیت کررہے تھے کہ اسی دوران ان کی چاہنے والی ایک خاتون پرستار نے موقع سے فائدہ اٹھایا اور وہیں سب کے سامنے انہیں شادی کی پیشکش کر ڈالی۔
خاتون نے سلمان خان سے بات چیت کے دوران کہا کہ جب سے میں نے آپ کو دیکھا ہے آپ کے پیار میں مبتلا ہوگئی ہوں کیا آپ مجھ سے شادی کریں گے؟
جس کا سلمان خان نے فوری طور پر غیر متوقع لیکن دلچسپ جواب دیا جس سے خاتون پرستار کے ارمان ٹھنڈے پڑ گئے۔
سلمان خان نے کہا کہ میری شادی کے دن ختم ہو گئے ہیں آپ نے مجھ سے شادی کرنی ہی تھی تو کم از کم مجھ سے 20 سال پہلے ملنا چاہیے تھا۔
