لاہور: قومی کرکٹ ٹیم میں ‘پروفیسر’ کے نام سے پکارے جانے والے محمد حفیظ نے پی ایس ایل کا فائنل جیتنے کے بعد معنی خیز پیغام دیا ہے۔
تفصیلات کے مطابق گذشتہ روز لاہور قلندرز نے پی ایس ایل کی تاریخ میں پہلی بار ٹرافی تھامی، جس کا سہرا تجربہ کار آل راؤنڈر محمد حفیظ کو جاتا ہے، جنہوں نے انتہائی مشکل وقت میں لاہور قلندرز کے لئے 69 رنز کی شاندار اننگز کھیلی۔
حفیظ کی شاندار نصف سینچری کی بدولت قلندرز نے فائنل جیتنے کے لئے ملتان سلطانز کو 181 رنز کا ہدف دیا تھا، بعد ازاں بولنگ میں پروفیسر نے سلطانز کے قائد محمد رضوان کی وکٹ لے کر قلندر کے لئے فتح کی بنیاد ڈالی۔
یہ بھی پڑھیں: ’ریٹائرمنٹ سے آگاہ کرنا چاہتا تھا رمیز راجہ نے وقت نہ دیا‘
محمد حفیظ کو فائنل میں 69 رنز کی شاندار اننگز اور 2 وکٹیں لینے پر مین آف دی میچ کا ایوارڈ دیا گیا۔
مین آف دی میچ کا ایوارڈ وصول کرنے کے بعد محمد حفیظ نے سماجی رابطے کا سہارا لیا اور معنی خیز کیپشن لکھا کہ ‘ ٹائیگر ابھی زندہ ہے’۔
Tiger 🐯 abhee Zinda hai pic.twitter.com/voLGmpieaK
— Mohammad Hafeez (@MHafeez22) February 27, 2022
واضح رہے کہ پاکستان کے لیے 55 ٹیسٹ 218 ون ڈے اور 119 ٹی 20 کھیلنے والے آل راؤنڈر محمد حفیظ نے گذشتہ ماہ بین الاقوامی کرکٹ سے باقاعدہ طور پر ریٹائرمنٹ کا اعلان کیا تھا، محمد حفیظ نے تینوں فارمیٹس میں قومی ٹیم کی قیادت کے فرائض انجام دے رکھے ہیں۔
محمد حفیظ نے پاکستان کے لیے 392 بین الااقومی میچو ں میں 12789 رنز 21 سنچریوں 64 نصف سنچریوں کی مدد سے بنائے، ایک مستند فیلڈر مانے جانے والے محمد حفیظ نے 160 کیچ لینے کے ساتھ بطور آف بریک بولر 253 وکٹیں بھی حاصل کیں۔
