کراچی پریس کلب کے باہر تحریک لبیک اور پی ٹی آئی کے کارکنوں میں ہاتھا پائی کا واقعہ پیش آیا ہے، اس دوران دونوں جانب سے لاتیں اور گھونسے چل پڑے۔
تفصیلات کے مطابق یوم یکجہتی کشمیر کے موقع پر کراچی پریس کلب کے باہر مختلف سیاسی جماعتوں اور تنظیموں کی جانب سے اظہار یکجہتی کیلئے مظاہروں کا سلسلہ جاری ہے۔
اسی سلسلے میں پاکستان تحریک انصاف کے زیراہتمام ایک ریلی پریس کلب پہنچی تاہم اس سے قبل وہاں پر تحریک لبیک پاکستان کے کارکنان بھی بڑی تعداد میں موجود تھے۔
اچانک کسی بات پر پریس کلب کے باہر تحریک لبیک اور پی ٹی آئی کے کارکنوں میں ہاتھا پائی شروع ہوگئی لیکن پی ٹی آئی رہنماؤں نے بیچ بچاؤ کروایا اور ریلی لے کر واپس چلے گئے۔
اس حوالے سے پی ٹی آئی کے رہنما راجہ اظہر کا کہنا ہے کہ ٹی ایل پی کی قیادت کیخلاف ریلی پر حملے کا مقدمہ درج کرائیں گے۔
بعد ازاں پی ٹی آئی کے رہنما راجہ اظہر، عطاءاللہ، بلال غفار، آفتاب جہانگیر تھانے پہنچ گئے اور پولیس کو بتایا کہ پی ٹی آئی کے پرامن کارکنان پر تحریک لبیک کے کارکنوں نے دھاوا بولا۔
بلال غفار کا کہنا تھا کہ تحریک لبیک کے کارکنان نے پہلے پی ٹی آئی ساؤنڈ سسٹم پر حملہ کیا، کشیدگی کے دوران پی ٹی آئی کا ایک کارکن زخمی بھی ہوا۔
انہوں نے کہا کہ حالات پُرامن رکھنے کی ذمہ داری پولیس پر عائد ہوتی ہے، تحریک لبیک کے کارکنان نے پی ٹی آئی ورکر کو زخمی کیا۔
