پی ٹی آئی رہنما شہباز گل نے کہا ہے امید ہے افواج پاکستان کی حمایت کے بعد اب حکومت 24 گھنٹے میں کمیشن بنا دے گی۔
اے آر وائی نیوز کے مطابق پاکستان تحریک انصاف کے رہنما شہباز گل نے اسلام آباد میں پریس کانفرنس کرتے ہوئے کہا کہ پاکستان میں مداخلت اور سازش کے معاملے پر موجودہ حکومت نے بھی کہا تھا کہ وہ کمیشن بنانے کو تیار ہے، انہوں نے خود بھی سائفر کو اسمبلی فلور ر مانا تھا اور کہا تھا کہ مداخلت ہوئی، آرمڈ فورس بھی کہہ رہی ہے کہ مداخلت ہوئی۔
شہباز گل نے کہا کہ ، پاکستان کی جڑوں میں میر جعفر اور میر صادق زہر ڈال رہے ہیں، ڈی جی آئی ایس پی آر نے واضح کردیا کہ اس معاملے پر کمیشن بنے، کمیشن بنانے کیلیے ان کی حمایت خوش آئندہ ہے، اب سلامتی کے ادارے کہہ چکے کہ کمیشن بننے پر کوئی اعتراض نہیں تو امید کرتے ہیں حکومت افواج پاکستان کی حمایت کے بعد 24 گھنٹے میں کمیشن بنادے گی۔
ان کا کہنا تھا کہ سابق وزیراعظم اورچیئرمین پی ٹی آئی عمران خان اس سازش کے خلاف کمیشن بنانے کا اعلان کرچکے تھے لیکن ہمارے پاس وقت نہیں تھا کہ کمیشن بنانے پر عملدرآمد کرتے، صدرمملکت نے چیف جسٹس کو پہلے ہی خط لکھ رکھا ہے، ڈاکٹر اشفاق ہمارے دور میں ہم پر تنقید کرتے تھے، کل ڈاکٹراشفاق نے بھی کہہ دیا کہ یہ پاکستان کیخلاف سازش ہوئی، پاکستان اورعوام کو معاشی طورپر ڈبویا جارہا ہے یہ سازش کے بغیر نہیں ہوسکتا، سوال یہ ہے کہ مداخلت کس نے روکنا تھی اب کمیشن یہ طے کرے گا۔
شہباز گل نے کہا کہ فیٹف سے متعلق اچھی خبر آرہی ہے، اس اچھی خبر کا کریڈٹ عمران خان اور پاکستان کے عوام کو جاتا ہے، سب کو یاد ہونا چاہیے کہ پاکستان گرے لسٹ میں کیوں گیا تھا، منی لانڈرنگ کی اس وجہ سے ہمارا ملک گرے لسٹ میں گیا تھا کیونکہ دنیا کو خدشہ تھا منی لانڈرنگ کا پیسہ دہشت گردی کے لیے خرچ نہ ہو۔
شہباز گل کا کہنا تھا کہ خان صاحب نے جاننے والوں کا جواب دینا ہےتو آپ خونی رشتوں کا جواب دےدیں، مریم اورنگزیب شہبازشریف کو کہتی ہیں کہ سب سے پہلے شہباز گل کو اٹھا لیتے ہیں، میں نے ابھی بنی گالہ جانا ہے جہاں سے دل کرے اٹھالیں، رانا ثنا اللہ جیسے بت کے سامنے جھکوں گا تو بھی میں شرک کروں گا، اگر آپ گھر کی خواتین پر بات کرینگے تو آپ کی سرجری پر بھی سوال آئیگا۔
تحریک انصاف کے رہنما نے گزشتہ روز کراچی میں قومی اسمبلی کے ایک حلقے میں ہونے والے ضمنی الیکشن کے حوالے سے کہا کہ کل کراچی کا الیکشن سب نے دیکھا، پی ٹی آئی جس ریس میں نہیں وہ ریس ہی نہیں، گدھوں کو دوڑائیں گے اور گھوڑا نہیں دوڑے گا تو یہ کھوتا ریس ہوگی، کھوتے گھوڑوں سے دھول زیادہ اڑاتے ہیں اور وہ دھول آپ پر رہی ہے۔
