کراچی: پی ٹی آئی سندھ کے صدر علی زیدی کو پولیس نے گرفتار کر لیا۔
پی ٹی آئی سندھ کے صدرعلی زیدی کو ڈیفنس کے دفتر سے گرفتار کر لیا گیا، ان کی گرفتاری ابراہیم حیدری تھانے میں درج فراڈ کے مقدمے میں کی گئی ہے۔
2013 کے معاملے پر گزشتہ روز ابراہیم حیدری تھانے میں مقدمہ درج کیا گیا تھا، علی زیدی کو دفتر سے دھکے مارتے ہوئے حراست میں لیا گیا، علی زیدی کے دفتر میں لگے سی سی ٹی وی فوٹیج میں اہل کاروں کو دھکے دیتے دیکھا جا سکتا ہے۔
دوسری طرف ساؤتھ زون پولیس نے بیان دیا ہے کہ ہمیں علم نہیں پی ٹی آئی رہنما کو کس نے گرفتار کیا، ساؤتھ زون پولیس نے انھیں گرفتار نہیں کیا۔
فردوس شمیم نقوی کے مطابق تحریک نصاف سندھ ہاؤس میں پولیس نے توڑ پھوڑ بھی کی، نہ ایف آئی آر دکھائی نہ کچھ بتایا، جس شخص نے واقعے کی ویڈیو بنائی ان کا موبائل بھی توڑ دیا گیا۔ انھوں نے شدید رد عمل ظاہر کرتے ہوئے کہا کہ سندھ حکومت کے لیے شرم سے ڈوب مرنے کا مقام ہے۔
پی ٹی آئی کراچی کے صدر آفتاب صدیقی نے علی زیدی کی گرفتاری کی مذمت کرتے ہوئے کہا کہ ملک کو بنانا ری پبلک بنا دیا گیا ہے، جو جس کو چاہے گرفتار کر لے۔
