کراچی: شہر قائد کے علاقے کلفٹن، تین تلوار پر ہنگامہ رائی، پولیس پر تشدد اور سرکاری گاڑیوں کی توڑ پھوڑ میں ملوث مزید 39 ملزمان کو گرفتار کر لیا گیا، مجموعی طور پر گرفتار ملزمان کی تعداد 72 ہو گئی۔
تفصیلات کے مطابق کراچی میں تین تلوار پر پاکستان تحریک انصاف کے کارکنان کی جانب سے احتجاج کے دوران ہنگامہ آرائی پر ڈسٹرکٹ ساؤتھ پولیس نے کراچی بھر میں تابڑ توڑ چھاپے اور کارروائیاں کیں، اور پی ٹی آئی کے 72 کارکنان کو گرفتار کر لیا۔
ایس ایس پی ساؤتھ ساجد سدوزئی کے ترجمان کے مطابق کراچی کے مختلف علاقوں سے گرفتار ملزمان کا تعلق سیاسی جماعت سے ہے، جن کو ڈیجیٹل شواہدوں میں شناخت کے بعد گرفتار کیا گیا، مزید گرفتاریاں بھی عمل میں لائی جا رہی ہیں۔
ترجمان ایس ایس پی کے مطابق ملزمان کی گرفتاری تھانہ فریئر میں درج مقدمے میں عمل میں لائی گئی ہے۔
دوسری طرف تین تلوار پر کار سرکار میں مداخلت، ہنگامہ آرائی اور پولیس پر حملے کے کیس میں پولیس کی جانب سے آج 30 ملزمان کو اے ٹی سی میں پیش کیا گیا، عدالت نے ملزمان کے 13 روزہ جسمانی ریمانڈ کی استدعا مسترد کرتے ہوئے انھیں عدالتی ریمانڈ پر جیل بھیجنے کا حکم دے دیا، اور آئندہ سماعت پر تفتیشی افسر سے رپورٹ طلب کر لی۔
الیکشن ڈے پر سندھ کے 10 اضلاع میں تصادم کا خدشہ ہے، رپورٹ
عدالت کو بتایا کہ ملزمان نے بغیر اجازت ریلی نکالی، پولیس کے روکنے پر پتھراؤ کیا گیا، جس کے نتیجے میں ایس ایچ او بوٹ بیسن سمیت دیگر پولیس اہلکار زخمی ہوئے۔
