پارلیمنٹ کے مشترکہ اجلاس کے موقع پر احتجاج کرنے والی پی ٹی آئی کی خواتین اراکیں کو گیٹ پر روکا تو وہ پارلیمنٹ کے دروازے پر چڑھ گئیں۔
اے آر وائی نیوز کے مطابق پارلیمنٹ کے مشترکہ اجلاس کے موقع پر پی ٹی آئی کی خواتین اراکین پارلیمنٹ لاجز سے احتجاج کرتے ہوئے پارلیمنٹ ہاؤس تک پہنچیں، انہوں نے ہاتھوں میں برتن بھی اٹھا رکھے تھے اور نعرے لگا رہی تھیں جہاں اسلام آباد پولیس نے انہیں اندر جانے سے روک دیا اور گیٹ بند کردیا۔
پی ٹی آئی رہنما کنول شوزب نے کہا کہ ہم این آر او ٹو نہیں مانگتے اور نہ ہی لینے دیں گے، اوورسیز کے ووٹوں پر ڈاکا ڈالنے کی کوشش کی جارہی ہے، ہم اپنا احتجاج ریکارڈ کرانے آئے ہیں اس موقع پر خواتین نے کہا کہ انہیں اندر جانے دیا جائے لیکن دروازہ نہ کھولنے پر پی ٹی آئی رہنما عالیہ حمزہ اور کنول شوزب پارلیمنٹ ہاؤس کے دروازے پر چڑھ گئیں اور خواتین نے دھکے دے کر گیٹ کھولا اور اپنی مدد آپ کے تحت پارلیمنٹ ہاؤس کے اندر آگئیں۔
اس تگ ودو کے دوران پی ٹی آئی رہنما عالیہ حمزہ کے ہاتھ اور پیر زخمی ہونے کی بھی اطلاعات ہیں، دوسری جانب پی ٹی آئی خواتین نے پارلیمنٹ ہاؤس میں داخل ہوکر احتجاج کیا اور ظلم کے ضابطے ہم نہیں مانتے، مریم کے پاپا چور ہیں سمیت دیگر نعرے لگائے۔
