ڈسٹرکٹ جیل اٹک سے رہا کئے گئے بیس سے زائد کارکنان کو دوبارہ گرفتار کرلیا گیا ہے۔
پولیس ذرائع کے مطابق عدالتی حکم پر ڈسٹرکٹ جیل اٹک سے 23 پی ٹی آئی کارکنان کو رہا کرتے ہی انہیں دوبارہ گرفتار کرلیا گیا۔
پولیس نے بتایا کہ ضمانت پر رہا کارکنان کو راولپنڈی کے مختلف علاقوں سے گرفتار کیا گیا تاہم انہیں سولہ ایم پی او کے تحت دوبارہ گرفتار کیا گیا۔
سولہ ایم پی او کے تحت گرفتار کئے جانے والے ان کارکنان کو اٹک جیل کے مرکزی گیٹ سے دوبارہ اندر بھیج دیا گیا ہے جہاں وہ ایک ماہ کے لئے نظر بند رہیں گے۔
ادھر چیئرمین پاکستان تحریک انصاف عمران خان کو پنجاب کی نگراں حکومت نے 9 مئی کے واقعات میں ملوث مطلوبہ افراد کی فہرست دے دی ہے۔
یہ بھی پڑھیں: زمان پارک سرچ آپریشن: عمران خان اور حکومتی ٹیم میں ڈیڈ لاک برقرار
نگراں وزیر اطلاعات و نشریات عامر میر نے نجی نیوز چینل سے گفتگو کرتے ہوئے اپنے ایک بیان میں کہا کہ زمان پارک میں سرچ آپریشن کے حوالے سے ڈیڈ لاک ہے کیونکہ عمران خان کا اصرار ہے کہ زیادہ پولیس اہلکار آپریشن کیلیے نہ آئیں۔
انہوں نے بتایا کہ چیئرمین پی ٹی آئی کو 2200 مطلوبہ افراد کی فہرست دی گئی ہے، ہم نے ان کو بتا دیا کہ یہ افراد ہمیں مطلوب ہیں۔
