ڈپٹی کمشنر لاہور رافعہ حیدر نے پاکستان تحریک انصاف کی مینارِ پاکستان پر جلسے کرنے کی درخواست مسترد کر دی۔
ڈی سی آفس نے پی ٹی آئی رہنما حماد اظہر کو خط لکھ کر درخواست مسترد ہونے سے آگاہ کر دیا۔ خط کے متن کے مطابق شہر کے حالات ایسے نہیں کہ جلسے کی اجازت دی جائے۔
سابق وزیر اعظم اور چیئرمین پی ٹی آئی عمران خان نے 13 مارچ کو لاہور میں ایک ریلی سے خطاب کرتے ہوئے اعلان کیا تھا کہ 19 مارچ کو مینار پاکستان پر جلسہ کریں گے جس میں کارکنوں کی بڑی تعداد شریک ہوگی۔
اے آر وائی نیوز کو ذرائع نے بتایا تھا کہ پنجاب کی نگراں حکومت نے پاکستان تحریک انصاف کو 19 مارچ کو لاہور میں مینار پاکستان پر اعلان کردہ جلسے کی اجازت نہ دینے کا فیصلہ کیا تھا۔
حکومتی ذرائع نے بتایا تھا کہ پنجاب کی نگراں حکومت نے پی ٹی آئی کو جلسے یا ریلی کی اجازت نہ دینے کا قطعی فیصلہ کر لیا، اگر اتوار 19 مارچ کو ریلی نکالی گئی تو اس روز لاہور شہر میں دفعہ 144 نافذ کر دی جائے گی۔